മേലാറ്റൂര്‍ (മലപ്പുറം): ട്രാവല്‍ ഏജന്‍സിയുടെ മറവില്‍ ഉംറ തട്ടിപ്പു നടത്തിയ പ്രതി റിമാന്‍ഡില്‍. മേലാറ്റൂര്‍ ബസ് സ്റ്റാന്‍ഡിന് സമീപം പ്രവര്‍ത്തിച്ചിരുന്ന ഗ്ലോബല്‍ ഗൈഡ് ആന്‍ഡ് ടൂറിസം എന്ന ട്രാവല്‍ ഏജന്‍സി നടത്തിയിരുന്ന അലനല്ലൂര്‍ സ്വദേശി കല്ലറക്കുന്നന്‍ അക്ബര്‍ അലിയെയാണ് മേലാറ്റൂര്‍ പൊലിസ് അറസ്റ്റ് ചെയ്തത്. 

കഴിഞ്ഞ ദിവസം രാത്രി പതിനൊന്നോടെ ഇയാള്‍ മേലാറ്റൂര്‍ പൊലിസ് സ്റ്റേഷനില്‍ വന്ന് കീഴടങ്ങുകയായിരുന്നു.
ഉംറക്ക് കൊണ്ടുപോകാമെന്നുപറഞ്ഞ് പണവും രേഖകളും കൈപ്പറ്റിയ ശേഷം വിശ്വാസവഞ്ചന കാണിച്ചുവെന്നും തീര്‍ഥാടകരെ മക്കയില്‍ ഉപേക്ഷിച്ചതുമായ പരാതികള്‍ പൊലിസിന് ലഭിച്ചിട്ടുണ്ട്. പാലക്കാട്, മണ്ണാര്‍ക്കാട്, അലനല്ലൂര്‍, മേലാറ്റൂര്‍ എന്നിവിടങ്ങളില്‍ ട്രാവല്‍ ഏജന്‍സി നടത്തിയിരുന്ന ഇദ്ദേഹം ആളുകളുടെ വിശ്വാസം നേടിയെടുത്ത് ഉംറക്ക് കൊണ്ടുപോകാമെന്ന് പറഞ്ഞ് ഏകദേശം 70 ലക്ഷം രൂപയോളം തട്ടിയെടുത്തതായാണ് വിവരം. ഇയാള്‍ക്കെതിരേ മേലാറ്റൂര്‍, നാട്ടുകല്‍ പൊലിസ് സ്റ്റേഷനുകളില്‍ നിരവധി പരാതികളും ലഭിച്ചിട്ടുണ്ട്.
ഇയാള്‍ക്കെതിരേ പൊലിസ് കേസെടുത്ത് അന്വേഷണം ഊര്‍ജിതമാക്കിയിരുന്നു.
ഏപ്രില്‍ അവസാന വാരത്തില്‍ ഇദ്ദേഹത്തിന്റെ ഗ്രൂപ്പില്‍ ഉംറക്ക് പോയ 84 തീര്‍ഥാടകര്‍ നാട്ടിലേക്ക് തിരിച്ച് പോരാനാകാതെ മക്കയില്‍ കുടുങ്ങിയിരുന്നു.

ഭക്ഷണവും താമസവും നിഷേധിക്കപ്പെട്ട ഇവര്‍ മറ്റു പലരുടെയും സഹായത്താലാണ് മക്കയില്‍ കഴിഞ്ഞിരുന്നത്. വയോധികരും രോഗികളുമായ പലരും ഒടുവില്‍ സ്വന്തം ചെലവിലാണ് നാട്ടിലെത്തിയത്. അക്ബര്‍ അലിയുടെ മേലാറ്റൂരിലുള്ള ഓഫിസിലും അലനല്ലൂരിലുള്ള വീട്ടിലും പൊലിസ് പരിശോധന നടത്തിയിരുന്നു.

രണ്ട് കംപ്യൂട്ടര്‍ ഹാര്‍ഡ് ഡിസ്‌കുകളും അക്ബറിന്റെ പേരിലുള്ള പാസ്‌പോര്‍ട്ടും മേലാറ്റൂരിലെ ഓഫിസില്‍ നിന്നും പൊലിസ് നേരത്തെ കണ്ടെടുത്തിരുന്നു. ഒരുമാസത്തോളമായി പ്രതി ചെന്നൈയിലും മറ്റുമായി ഒളിവില്‍ കഴിയുകയായിരുന്നു. ഇന്നലെയാണ് പെരിന്തല്‍മണ്ണ കോടതിയില്‍ പ്രതിയെ ഹാജരാക്കിയത്.