കണ്ണൂര്‍: മുഖ്യമന്ത്രി പിണറായി വിജയന്റെ മുമ്പില്‍ നേരെ നിന്ന് സംസാരിക്കാന്‍ എല്‍.ഡി.എഫിലെ ഘടക കക്ഷികള്‍ക്ക് പോലും ഭയമാണെന്നു കെ.സി ജോസഫ് എം.എല്‍.എ. കേരള ഗസറ്റഡ് ഓഫിസേര്‍സ് അസോസിയേഷന്‍ കണ്ണൂര്‍ പൊലിസ് കോഓപറേറ്റിവ് ഹാളില്‍ സംഘടിപ്പിച്ച യാത്രയപ്പ് സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. സംസ്ഥാനത്ത് ഭരണനിയന്ത്രണം ഒരുവ്യക്തിയുടെ കയ്യിലാണ്. മറ്റൊരു കക്ഷിക്കും സംസാരിക്കാനോ പ്രതികരിക്കാനോ അവസരമില്ല. കണ്ണൂര്‍ സി.പി.എം എന്ന ഭാവത്തിന്റെ പ്രതിഫലനമാണ് സര്‍ക്കാരില്‍ കാണാനാകുന്നത്. ഉദ്യോഗസ്ഥരെ രാഷ്ട്രീയം നോക്കി സ്ഥലം മാറ്റുന്നു. വിരമിക്കാന്‍ ദിവസങ്ങള്‍ മാത്രം ബാക്കിയുള്ള ഉദ്യോഗസ്ഥരെ പോലും സംഘടന നോക്കി സ്ഥലം മാറ്റി. മാനുഷിക പരിഗണന പോലും നല്‍കാതെ ജീവനക്കാരെ രണ്ടായി കണ്ട് പകപോക്കുകയാണ് പിണറായി ചെയ്യുന്നതെന്നും അദ്ദേഹം കുറ്റപ്പെടുത്തി. അസോസിയേഷന്‍ ജില്ലാ പ്രസിഡന്റ് വി ശശീന്ദന്‍ അധ്യക്ഷനായി. സംസ്ഥാന പ്രസിഡന്റ് സി രാജന്‍പിളള മുഖ്യപ്രഭാഷണം നടത്തി. വിരമിക്കുന്ന ഏഴു ഉദ്യോഗസ്ഥര്‍ക്ക് ഉപഹാരം നല്‍കി. എസ് അജയന്‍, കെ പ്രമോദ്, സി.എം ഗോപിനാഥന്‍, ഒ മുഹമ്മദ് അസ്‌ലം, തറമ്മല്‍ നാരായണന്‍ എം.പി വേലായുധന്‍, എന്‍ പ്രദീപ് കുമാര്‍, യു.എന്‍ രാജചന്ദ്രന്‍ സംസാരിച്ചു.