റിയാദ്: സഊദിയിൽ വീട്ടു ജോലിക്കാരുടെ റിക്രൂട്ട്മെന്റ് പുനഃരാരംഭിച്ചു. കൊവിഡ് പ്രതിരോധ പ്രവർത്തനങ്ങളുടെ ഭാഗമായി നേരത്തെ അടച്ചിരുന്ന കര,  കടൽ, വ്യോമ പ്രവേശന കവാടങ്ങൾ ഭാഗികമായി തുറന്നതോടെയാണ് ഏഴു മാസങ്ങൾക്ക് മുമ്പ് നിർത്തി വെച്ച വീട്ടു ജോലിക്കാരുടെ നിയമനങ്ങൾ പുനഃസ്ഥാപിച്ചത്. സഊദി മാനവ വിഭവശേഷി, സാമൂഹിക വികസന മന്ത്രി അഹ്‌മദ്‌ അൽ രാജ്‌ഹിയാണ് ഇത് സംബന്ധിച്ച നിർദേശം പുറപ്പെടുവിച്ചത്. മന്ത്രാലയത്തിന്റെ ഗാർഹിക തൊഴിൽ നിയമന വെബ്‌സൈറ്റ് "മുസാനിദ്" ൽ ഒക്ടോബർ 31 വരെ പുതിയ കരാറുകൾക്കുള്ള അപേക്ഷകൾ സ്വീകരിച്ചു തുടങ്ങി.

     കൊറോണ വൈറസ് വ്യാപനത്തെ തുടർന്ന് മാർച്ച് 16 ന് വീട്ടുജോലിക്കാരെ നിയമിക്കുന്ന നടപടി തൊഴിൽ മന്ത്രാലയം താൽക്കാലികമായി നിർത്തിവച്ചിരിക്കുകയായിരുന്നു. 120 ദിവസമാണ് പുതിയ കരാറുകളുടെ നിയമന കാലയളവ്. കരാർ റദ്ദാക്കുകയോ വീട്ടുജോലിക്കാരൻ കാലയളവ് അവസാനിക്കുന്നതിനുമുമ്പ് എത്താതിരിക്കുകയോ ചെയ്താൽ, കരാർ അസാധുവായി കണക്കാക്കുകയും കരാർ മൂല്യം തിരികെ നൽകാൻ ലൈസൻസുള്ള സ്ഥാപനം ബാധ്യസ്ഥമാവുകയും ചെയ്യും. ഇതോടൊപ്പം, കരാർ മൂല്യത്തിന്റെ 20 ശതമാനം കാലതാമസം നേരിടുന്ന ഉപഭോക്താവിന് പിഴയൊടുക്കേണ്ടിയും വരും.

         കൊവിഡ് വൈറസ് വ്യാപനം അധികമായാൽ മൂലം യാത്ര നിരോധനമുള്ള രാജ്യങ്ങളിൽ നിന്നും ഗാർഹിക തൊഴിലാളികളെ റിക്രൂട്ട് ചെയ്യാൻ പ്രത്യേക സംവിധാനങ്ങൾ ഏർപ്പെടുത്തുമെന്നും റിപ്പോർട്ടിൽ വ്യക്തമാക്കുന്നുണ്ട്. വിദേശ ഗാർഹിക തൊഴിലാളികളെ ജോലിക്കെടുക്കുന്നതിനായി മന്ത്രാലയം 2015 ൽ ആരംഭിച്ച "മുസാനിദ്" പോർട്ടൽ വഴിയാണ് റിക്രൂട്ട്മെന്റ് നടപടികൾ പൂർത്തിയാക്കേണ്ടത്. ഇതിനുള്ള . കൃത്യമായ വിവരങ്ങൾ നൽകിയാൽ പോർട്ടൽ ഉടനടി അനുമതി നൽകും. വളരെ എളുപ്പത്തിൽ ഇലക്ട്രോണിക് വിസ നേടാൻ തൊഴിലുടമകളെ പ്രാപ്തമാക്കുന്നതാണ് ഈ പോർട്ടൽ. വീട്ടുജോലിക്കാരെ റിക്രൂട്ട് ചെയ്യുന്നതിനുള്ള നടപടിക്രമങ്ങൾ സുഗമമാക്കുന്നതിനും അതോടൊപ്പം തൊഴിലാളികളുടെയും തൊഴിലുടമയുടെയും ഉൾപ്പെടെ എല്ലാവരുടെയും അവകാശങ്ങൾ സംരക്ഷിക്കുന്നതിനും മുസാനിദ് ശ്രദ്ധ കേന്ദ്രീകരിക്കുന്നുണ്ട്.