കാസര്‍കോട്: സമസ്ത കേരള ജംഇയ്യത്തുല്‍ മുഅല്ലിമീന്റെ ആഭിമുഖ്യത്തില്‍ നടക്കുന്ന പതിനാലാമത് ഇസ്‌ലാമിക കലാമേളയെ വരവേല്‍ക്കാന്‍ ചട്ടഞ്ചാല്‍ മാഹിനാബാദിലെ സി.എം ഉസ്താദ് നഗര്‍ ഒരുങ്ങി. കേരളം, തമിഴ്‌നാട്, കര്‍ണാടക, ലക്ഷ്വദീപ് എന്നിവിടങ്ങളില്‍ നിന്നായി മൂവായിരത്തോളം മത്സരാര്‍ഥികള്‍ നാളെ മുതല്‍ മൂന്നു ദിവസങ്ങളിലായി മലബാര്‍ ഇസ്‌ലാമിക് കോംപ്ലക്‌സില്‍ പ്രത്യേകം തയാറാക്കിയ സി.എം ഉസ്താദ് നഗറില്‍ നടക്കുന്ന കലാമേളയില്‍ മാറ്റുരക്കുമെന്നു സ്വാഗതസംഘം ഭാരവാഹികള്‍ പത്ര സമ്മേളനത്തില്‍ അറിയിച്ചു.
നാളെ ഉച്ചക്ക് 2.30ന് ചെമ്പരിക്ക സി.എം ഉസ്താദ് മഖാമില്‍ സയ്യിദ് എം.എസ് തങ്ങള്‍ മദനി ഓലമുണ്ട പ്രാര്‍ഥനക്ക് നേതൃത്വം നല്‍കും. വൈകുന്നേരം നാലിന് മാഹിനാബാദിലെ കലാമേള നഗരിയില്‍ സമസ്ത ജില്ലാ പ്രസിഡന്റ് ഖാസി ത്വാഖ അഹമ്മദ് അല്‍ അസ്ഹരി പതാക ഉയര്‍ത്തും. തുടര്‍ന്ന് കലാമേളയുടെ ഉദ്ഘാടനം സമസ്ത കേരള ജംഇയ്യത്തുല്‍ മുഅല്ലിമീന്‍ സംസ്ഥാന പ്രസിഡന്റ് സി.കെ.എം സ്വാദിഖ് മുസ്‌ലിയാര്‍ നിര്‍വഹിക്കും. ചടങ്ങില്‍ സ്വാഗത സംഘം ചെയര്‍മാന്‍ യു.എം അബ്ദുല്‍ റഹിമാന്‍ മൗലവി അധ്യക്ഷനാകും. സമസ്ത കേരള ഇസ്‌ലാം മത വിദ്യാഭ്യാസ ബോര്‍ഡ് ജനറല്‍ സെക്രട്ടറി എം.ടി അബ്ദുല്ല മുസ്‌ലിയാര്‍ മുഖ്യാതിഥിയാകും.
സ്വാഗത സംഘം ജനറല്‍ കണ്‍വീനര്‍ ഡോ.ബഹാഉദ്ദീന്‍ മുഹമ്മദ് നദ്‌വി, സമസ്ത വിദ്യാഭ്യാസ ബോര്‍ഡ് സെക്രട്ടറി എം.എ ഖാസിം മുസ്‌ലിയാര്‍ തുടങ്ങി വിവിധ പ്രമുഖര്‍ ചടങ്ങില്‍ സംസാരിക്കും.
13 ന് രാവിലെ 8 .30 മുതല്‍ കലാമത്സരങ്ങള്‍ ആരംഭിക്കും. രാവിലെ 10ന് സ്പീക്കര്‍ പി ശ്രീരാമകൃഷ്ണന്‍ ചടങ്ങ് ഉദ്ഘാടനം ചെയ്യും. സമസ്ത പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ അധ്യക്ഷനാകും. പി കരുണാകരന്‍ എം.പി ചടങ്ങില്‍ സംസാരിക്കും. 14ന് വൈകുന്നേരം നാലിന് സമാപന സമ്മേളനം പാണക്കാട് സയ്യിദ് അബ്ബാസലി ശിഹാബ് തങ്ങള്‍ ഉദ്ഘാടനം ചെയ്യും. സമസ്ത ജനറല്‍ സെക്രട്ടറി പ്രൊഫ. കെ ആലിക്കുട്ടി മുസ്‌ലിയാര്‍ അധ്യക്ഷനാകും. വിവിധ ദിവസങ്ങളിലെ ചടങ്ങുകളില്‍ പി.ബി അബ്ദുല്‍ റസാഖ് എം.എല്‍.എ, എന്‍.എ നെല്ലിക്കുന്ന് എം.എല്‍.എ, സ്വാഗത സംഘം ട്രഷറര്‍ ഡോ.ഖത്തര്‍ ഇബ്രാഹിം ഹാജി, എസ്.വൈ.എസ്.സംസ്ഥാന വൈസ് പ്രസിഡന്റ് മെട്രോ മുഹമ്മദ് ഹാജി, ഖാസി പയ്യക്കി അബ്ദുല്‍ഖാദര്‍ മുസ്‌ലിയാര്‍, ഇ.കെ മഹ്മൂദ് മുസ്‌ലിയാര്‍ തുടങ്ങി പ്രമുഖര്‍ സംബന്ധിക്കും. കലാമേളക്കുള്ള എല്ലാവിധ ഒരുക്കങ്ങളും പൂര്‍ത്തിയായതായി സ്വാഗത സംഘം ഭാരവാഹികളായ യു.എം അബ്ദുല്‍ റഹ്മാന്‍ മൗലവി, അബൂബക്കര്‍ സാലൂദ് നിസാമി, സയ്യിദ് ഹുസൈന്‍ തങ്ങള്‍, ഹമീദ് കുണിയ, മൊയ്തു ചെര്‍ക്കള എന്നിവര്‍ പറഞ്ഞു.