കൊല്‍ക്കത്ത: ഫിഫ അണ്ടര്‍ 17 ലോകകപ്പിന്റെ ആദ്യ ടിക്കറ്റ് ശിബ്ദാസ് ഭാദുരിക്കുള്ള ആദരമായി സമര്‍പ്പിക്കും. 1911ല്‍ മോഹന്‍ ബഗാന്‍ നായകനായിരുന്ന ശിബ്ദാസ് ഭാദുരിയുടെ നേതൃത്വത്തിലുള്ള ടീം ഇംഗ്ലീഷ് ടീമിനെ പരാജയപ്പെടുത്തി ഐ.എഫ്.എ ഷീല്‍ഡ് ട്രോഫി സ്വന്തമാക്കിയിരുന്നു. മുന്‍ ഇതിഹാസ നായകന്റെ സ്മരണാര്‍ഥം അദ്ദേഹത്തിന്റെ ചെറുമകന്റെ ഭാര്യ ഗൗരി ഭാദുരിക്ക് ലോകകപ്പിന്റെ ആദ്യ ടിക്കറ്റ് മുന്‍ സ്പാനിഷ് ഇതിഹാസം കാര്‍ലോസ് പുയോളും കേന്ദ്ര കായിക മന്ത്രി വിജയ് ഗോയലും ചേര്‍ന്ന് നല്‍കും. 

ഭാദുരി കുടുംബത്തിനുള്ള ടിക്കറ്റ് കൈമാറ്റം ഈ മാസം 15ന് നടക്കും. ലോകകപ്പിന്റെ ഔദ്യോഗിക ടിക്കറ്റ് വില്‍പ്പന 16നും നടക്കും. ശിബ്ദാസ് ഭാദുരിയുടെ കുടുംബത്തിന് ലോകകപ്പ് പോരാട്ടങ്ങള്‍ നടക്കുന്ന ആറ് വേദികളിലും വന്ന് മത്സരങ്ങള്‍ കാണാനും അവസരമൊരുക്കിയിട്ടുണ്ട്.