തിരുവനന്തപുരം: നിയമസഭ മാധ്യമ അവാര്‍ഡ് 2018 പ്രഖ്യാപിച്ചു. ആര്‍ ശങ്കരനാരായണന്‍ തമ്പി നിയമസഭ മാധ്യമ അവാര്‍ഡിന് അച്ചടി മാധ്യമ വിഭാഗത്തില്‍ മാധ്യമം ആഴ്ചപ്പതിപ്പിലെ ഷെബിന്‍ മെഹബൂബ് അര്‍ഹനായി. ദൃശ്യ മാധ്യമ വിഭാഗത്തില്‍ മീഡിയവണ്‍ ടി.വിയിലെ ഉല്ലാസ് മാവിലായിതെരഞ്ഞെടുക്കപ്പെട്ടു.
അന്വേഷണാത്മക മാധ്യമ സൃഷ്ടികള്‍ക്കായി ഏര്‍പ്പെടുത്തിയിട്ടുള്ള ഇ.കെ നായനാര്‍ നിയമസഭ മാധ്യമ അവാര്‍ഡിന് അച്ചടി മാധ്യമ വിഭാഗത്തില്‍ കേരള കൗമുദിയിലെ വി.എസ് രാജേഷും, ദൃശ്യമാധ്യമ വിഭാഗത്തില്‍ ഏഷ്യാനെറ്റ് ന്യൂസിലെ പി.ആര്‍ പ്രവീണയും തെരഞ്ഞെടുക്കപ്പെട്ടു.
നിയമസഭ നടപടികളുടെ ഏറ്റവും മികച്ച റിപ്പോര്‍ട്ടിങിന് നല്‍കുന്ന ജി കാര്‍ത്തികേയന്‍ നിയമസഭ മാധ്യമ അവാര്‍ഡിന് അച്ചടി മാധ്യമ വിഭാഗത്തില്‍ മലയാളം വാരികയിലെ പി.എസ് റംഷാദും ദൃശ്യ മാധ്യമ വിഭാഗത്തില്‍ മീഡിയാവണ്‍ ടി.വിയിലെ കെ. സജീഷും തെരഞ്ഞെടുക്കപ്പെട്ടു. 50,000 രൂപയും പ്രശസ്തിപത്രവും ഫലകവും അടങ്ങുന്നതാണ് അവാര്‍ഡുകള്‍.
കേരള നിയമസഭ പാര്‍ലമെന്ററി പഠന പരിശീലന കേന്ദ്രം നടത്തുന്ന പാര്‍ലമെന്ററി പ്രാക്ടീസ് ആന്‍ഡ് പ്രൊസീജിയര്‍ 2018ലെ സര്‍ട്ടിഫിക്കറ്റ് കോഴ്‌സിന്റെ പരീക്ഷാഫലവും സ്പീക്കര്‍ പ്രഖ്യാപിച്ചു. എറണാകുളം ജെ.എന്‍ റോഡില്‍, മങ്കാട്ട് ഹൗസില്‍ ശ്രീജിത്ത് എം നായര്‍ 86 ശതമാനം മാര്‍ക്കോടെ ഒന്നാം റാങ്ക് നേടി.