ലണ്ടന്‍: ബ്രിട്ടനില്‍ സന്ദര്‍ശനം നടത്തുന്ന യു.എസ് പ്രസിഡന്റ് ഡൊണാള്‍ഡ് ട്രംപിന്റെ ഭാഷ 20ാം നൂറ്റാണ്ടിലെ ഫാസിസ്റ്റുകളുടേതിനു തുല്യമെന്ന് ലണ്ടന്‍ മേയര്‍ സാദിഖ് ഖാന്‍.
മൂന്നുദിവസത്തെ സന്ദര്‍ശനത്തിനായി ഭാര്യയോടൊപ്പം ലണ്ടനിലെത്തിയ ട്രംപിന് ചുവപ്പു പരവതാനി വിരിച്ച സര്‍ക്കാര്‍ നിലപാടിനെയും ദ ഗാര്‍ഡിയന്റെ ഒബ്‌സര്‍വര്‍ സപ്ലിമെന്റിലെഴുതിയ ലേഖനത്തില്‍ ഖാന്‍ അപലപിച്ചു.
ഇസ്‌ലാമിനെക്കുറിച്ചുള്ള ട്രംപിന്റെ കാഴ്ചപ്പാട് അദ്ദേഹത്തിന്റെ അജ്ഞതയെയാണ് കാണിക്കുന്നതെന്ന് വിമര്‍ശിച്ചതിന് 2016ല്‍ ഖാനെ ഐ.ക്യു ടെസ്റ്റിനു വിധേയനാക്കണമെന്ന് ട്രംപ് പരിഹസിച്ചിരുന്നു.
ഖാന്‍ ഭീകരതയെ സഹായിക്കുന്നതായും ട്രംപ് കുറ്റപ്പെടുത്തിയിരുന്നു.
മുന്‍ വിദേശകാര്യ സെക്രട്ടറിയായ ബോറിസ് ജോണ്‍സന്‍ ബ്രിട്ടിഷ് പ്രധാനമന്ത്രിയാവുന്നതിനെ പിന്തുണയ്ക്കുന്നതായി കഴിഞ്ഞദിവസം ട്രംപ് പറഞ്ഞിരുന്നു.