നെടുമ്പാശ്ശേരി: ഹജ്ജ് ക്യാംപിന്റെ പ്രവര്‍ത്തനങ്ങള്‍ ക്രമീകരിക്കുന്നതിനായി സംസ്ഥാന ഹജ്ജ് കമ്മിറ്റി പ്രതിനിധികളുടെയും വിവിധ വകുപ്പ് പ്രതിനിധികളുടെയും സംയുക്തയോഗം ഇന്ന് രാവിലെ 11.30ന് അന്താരാഷ്ട്ര വിമാനത്താവളത്തിലെ സിയാല്‍ കോണ്‍ഫറന്‍സ്ഹാളില്‍ ചേരും.

ഹജ്ജ് കമ്മിറ്റി പ്രതിനിധികള്‍ക്കു പുറമെ ഈ വര്‍ഷത്തെ ഹജ്ജ് വിമാനസര്‍വിസിന് കരാര്‍ ലഭിച്ചിട്ടുള്ള സൗദി എയര്‍ലൈന്‍സിലെ ഉദ്യോഗസ്ഥര്‍, കസ്റ്റംസ്, എമിഗ്രേഷന്‍, ഉയര്‍ന്ന പൊലിസ് ഉദ്യോഗസ്ഥര്‍, ആര്‍.ടി.ഒ, കെ.എസ്.ആര്‍.ടി.സി, സിയാല്‍ പ്രതിനിധികള്‍, സി.ഐ.എസ്.എഫ് തുടങ്ങി വിവിധ വകുപ്പുകളിലെ ഉദ്യോഗസ്ഥര്‍ യോഗത്തില്‍ സംബന്ധിക്കും.

ഹജ്ജ് ക്യാംപിലെ ഇതുവരെയുള്ള ഒരുക്കങ്ങളെകുറിച്ച് യോഗം വിലയിരുത്തും. ക്യാംപില്‍വച്ച് തന്നെ സുരക്ഷാ പരിശോധനകള്‍ പൂര്‍ത്തിയാക്കി ബോര്‍ഡിങ് പാസ് നല്‍കുന്നതിനാണ് അധികൃതര്‍ ആലോചിക്കുന്നത്. ഇതിനായി ഹജ്ജ് ക്യാംപ് പ്രവര്‍ത്തിക്കുന്ന എയര്‍ക്രാഫ്റ്റ് മെയിന്റനന്‍സ് ഹാങ്കറില്‍ സൗദി എയര്‍ലൈന്‍സിന്റെ പ്രത്യേകകൗണ്ടര്‍ പ്രവര്‍ത്തിക്കും. തീര്‍ഥാടകരുടെ ബാഗേജുകളുടെ പരിശോധനയും ക്യാംപില്‍വച്ച് തന്നെ പൂര്‍ത്തിയാക്കും. തുടര്‍ന്ന് തീര്‍ഥാടകരെ പ്രത്യേക വാഹനത്തില്‍ വിമാനത്തിന്റെ അടുത്ത് എത്തിക്കും. മൂന്ന് ബസുകളിലായാണ് ക്യാംപില്‍ നിന്നും തീര്‍ഥാടകരെ വിമാനത്താവളത്തില്‍ എത്തിക്കുക.

സംസ്ഥാനത്ത് നിന്നുള്ള തീര്‍ഥാടകരുടെ ലഗേജുകള്‍ പെട്ടെന്ന് തിരിച്ചറിയാനും നഷ്ടപ്പെടാതിരിക്കാനുമായി ഹജ്ജ് കമ്മിറ്റിയുടെ വളണ്ടിയര്‍മാര്‍ തീര്‍ഥാടകരുടെ ലഗേജില്‍ പ്രത്യേക സ്റ്റിക്കറുകള്‍ പതിക്കും. ട്രെയിന്‍ മാര്‍ഗവും ബസ് മാര്‍ഗവും ആലുവ, അങ്കമാലി റെയില്‍വെ സ്റ്റേഷനുകളിലും കെ.എസ്.ആര്‍.ടി.സി സ്റ്റാന്റുകളിലും എത്തുന്ന തീര്‍ഥാടകരെ യാതൊരു ബുദ്ധിമുട്ടും നേരിടാതെ നെടുമ്പാശേരിയിലെ ഹജ്ജ് ക്യാംപില്‍ എത്തിക്കുന്നതിന് സ്വാഗതസംഘം കമ്മിറ്റിയുടെ നേതൃത്വത്തില്‍ പ്രത്യേകവിഭാഗംപ്രവര്‍ത്തിക്കും.