കുട്ടികള്‍ കൊല്ലപ്പെട്ടു

കൊണ്ടോട്ടി:സംസ്ഥാനത്ത് നാലു മാസത്തിനിടെ ശാരീരിക, മാനസിക പീഡനത്തിന് ഇരയായത് 2,550 കുട്ടികള്‍.
1,394 ആക്രമണ കേസുകളും 1,156 ലൈംഗികാതിക്രമ പോക്‌സോ കേസുകളുമാണ് സംസ്ഥാനത്തിന്റെ വിവിധ ഭാഗങ്ങളിലെ പൊലിസ് സ്റ്റേഷനുകളില്‍ 120 ദിവസത്തിനിടെ റിപ്പോര്‍ട്ട് ചെയ്തത്.
ജനുവരി മുതല്‍ ഏപ്രില്‍ വരെ സംസ്ഥാനത്ത് എട്ട് കുട്ടികളാണ് കൊല്ലപ്പെട്ടത്. 397 ബലാത്സംഗ കേസുകളുമുണ്ടായി. 66 കുട്ടികളെ തട്ടിക്കൊണ്ടുപോയ കേസുകളും രജിസ്റ്റര്‍ ചെയ്തു.

ശൈശവ വിവാഹത്തിനെതിരേ മൂന്ന് കേസുകളും റിപ്പോര്‍ട്ട് ചെയ്തിട്ടുണ്ട്. വിവിധ രീതിയില്‍ ക്രൂരമായി ആക്രമണത്തിന് ഇരയായത് 915 കുട്ടികളാണ്. കഴിഞ്ഞ വര്‍ഷം ആകെ 4,008 കേസുകളാണ് കേരളത്തിലുണ്ടായത്.

നാലു മാസത്തിനിടെ പോക്‌സോ കേസുകളിലും ക്രമാതീതമായ വര്‍ധനവാണുണ്ടായത്. 18 വയസിന് താഴെയുളള കുട്ടികളെ ലൈംഗികാതിക്രമം നടത്തിയതിന് 1,156 പോക്‌സോ കേസുകളാണ് രജിസ്റ്റര്‍ ചെയ്തത്.
ഹൈസ്‌കൂള്‍,ഹയര്‍സെക്കന്‍ഡറികളില്‍ പഠിക്കുന്ന വിദ്യാര്‍ഥികളാണ് കൂടുതലും ലൈംഗിക ചൂഷണത്തിന് ഇരയാകുന്നത്. സംസ്ഥാനത്ത് ഏറ്റവും കൂടുതല്‍ പോക്‌സോ കേസുകള്‍ റിപ്പോര്‍ട്ട് ചെയ്തത് മലപ്പുറം ജില്ലയിലാണ്. 176 കേസുകളാണ് മലപ്പുറത്ത് രജിസ്റ്റര്‍ ചെയ്തത്.ഇവരില്‍ അധ്യാപകന്‍ മുതല്‍ പ്രാദേശിക രാഷ്ട്രീയ നേതാക്കള്‍ വരെ പ്രതികളാണ്.

25 കേസുകള്‍ രജിസ്റ്റര്‍ ചെയ്ത പത്തനംതിട്ട ജില്ലയിലാണ് ഏറ്റവും കുറവ് കേസുകള്‍.
വിവിധ ജില്ലകളിലെ പൊലിസ് സ്റ്റേഷനുകളില്‍ റിപ്പോര്‍ട്ട് ചെയ്ത പോക്‌സോ കേസുകളുടെ കണക്കുകള്‍ ഇങ്ങിനെ. തിരുവനന്തപുരം(147),കൊല്ലം(90),ആലപ്പുഴ(54),കോട്ടയം(64),ഇടുക്കി(44),എറണാംകുളം(114),തൃശൂര്‍(82),പാലക്കാട്(82),കോഴിക്കോട്(94),വയനാട്(48),കണ്ണൂര്‍(75),കാസര്‍ക്കോട്(60). റെയില്‍വേ സ്റ്റേഷനില്‍ ഒരു കേസും റിപ്പോര്‍ട്ട് ചെയ്തു. കഴിഞ്ഞ വര്‍ഷം ആകെ 3,179 പോക്‌സോ കേസുകളാണുണ്ടായത്.