തിരുവനന്തപുരം: സി.എച്ച് മുഹമ്മദ് കോയയുടെ പേരില്‍ സ്ഥാപിച്ച സി.എച്ച് ഫൗണ്ടേഷന്റെ ഈ വര്‍ഷത്തെ അവാര്‍ഡുകള്‍ എഴുത്തുകാരന്‍ യു.എ ഖാദറിനും ഡോ. ഡി. ബാബു പോളിനും. 26ന് വൈകിട്ട് അഞ്ചിന് മസ്‌കറ്റ് ഹോട്ടലില്‍ നടക്കുന്ന ചടങ്ങില്‍ അവാര്‍ഡുകള്‍ സമ്മാനിക്കും.

സി.എച്ചിന്റെ പേരിലുള്ള സാഹിത്യ അവാര്‍ഡാണ് കേന്ദ്ര സാഹിത്യ അക്കാദമി അവാര്‍ഡും കേരളാ സാഹിത്യ അക്കാദമിയുടെ സമഗ്ര സംഭാവനാ പുരസ്‌കാരവും നേടിയിട്ടുള്ള യു.എ ഖാദറിന് സമ്മാനിക്കുന്നത്. സാമൂഹ്യപ്രവര്‍ത്തനം, സാഹിത്യരചന, സിവില്‍ സര്‍വിസ് ഭരണം എന്നിവകളില്‍ വ്യക്തിമുദ്ര പതിപ്പിച്ചതിന് സമഗ്ര സേവനരംഗത്തുള്ള പുരസ്‌കാരമാണ് മുന്‍ അഡീഷനല്‍ ചീഫ് സെക്രട്ടറി ഡി. ബാബു പോളിന് സമ്മാനിക്കുന്നത്. കൂടാതെ, മാധ്യമപ്രവര്‍ത്തന രംഗത്ത് അര നൂറ്റാണ്ട് പിന്നിടുന്ന കലാപ്രേമി ബഷീര്‍ ബാബുവിനെ ആദരിക്കും. ഡോ. എം.കെ മുനീര്‍ അധ്യക്ഷനാകുന്ന ചടങ്ങില്‍ മന്ത്രിമാരായ ഇ.പി ജയരാജന്‍, കെ.ടി ജലീല്‍ തുടങ്ങിയവര്‍ പങ്കെടുക്കും.
വാര്‍ത്താസമ്മേളനത്തില്‍ സി.എച്ച് ഫൗണ്ടേഷന്‍ ചെയര്‍മാന്‍ പി.എ ഹംസ, ഓര്‍ഗനൈസിങ് കമ്മിറ്റി കണ്‍വീനര്‍ കരമന ബയാര്‍ എന്നിവര്‍ പങ്കെടുത്തു.