കോഴിക്കോട്: പടിഞ്ഞാറെത്തറ ബാണാസുരയില്‍ മാവോയിസ്റ്റ് അംഗം കൊല്ലപ്പെട്ടത് വ്യാജ ഏറ്റുമുട്ടലിലാണെന്ന ആരോപണം ശക്തമായിരിക്കെ സി.പി.ഐയുടെ മൗനം സര്‍ക്കാരിന് രക്ഷാകവചമായി. പൊലിസ് - മാവോയിസ്റ്റ് ഏറ്റുമുട്ടല്‍കൊല ഉണ്ടായപ്പോഴൊക്കെ സി.പി.ഐ ശക്തമായി രംഗത്തുവന്നിരുന്നു.
ഈ സര്‍ക്കാര്‍ അധികാരത്തില്‍ വന്നശേഷമുള്ള എട്ടാമത്തെ മാവോയിസ്റ്റാണ് ഇന്നലെ പടിഞ്ഞാറെത്തറയില്‍ കൊല്ലപ്പെടുന്നത്. നേരത്തെ നടന്ന ഏഴ് വെടിയേറ്റ് മരണങ്ങളും വ്യാജ ഏറ്റുമുട്ടലിനെ തുടര്‍ന്നാണെന്ന് സി.പി.ഐ ആരോപിച്ചിരുന്നു. എന്നാല്‍ തെരഞ്ഞെടുപ്പിന് തൊട്ടുമുന്‍പുണ്ടായ പടിഞ്ഞാറെത്തറ സംഭവം കണ്ടില്ലെന്ന് നടിക്കുകയാണ് സി.പി.ഐ.
മാവോയിസ്റ്റുകളെ രാഷ്ട്രീയ പ്രശ്‌നമായി കാണണമെന്നും അവരെ പിടികൂടി നിയമപരമായി ശിക്ഷിക്കുന്നതിന് പകരം കൊലപ്പെടുത്തുന്നത് മനുഷ്യത്വവിരുദ്ധമാണെന്നുമാണ് സി.പി.ഐയുടെ നേരത്തെയുള്ള നിലപാട്.

2016 നവംബര്‍ 24ന് മലപ്പുറം ജില്ലയിലെ കരുളായി വനത്തിലുണ്ടായ ഏറ്റുമുട്ടലില്‍ തമിഴ്‌നാട് സ്വദേശികളായ കുപ്പു ദേവരാജും കാവേരി എന്ന അജിതയും കൊല്ലപ്പെട്ടതാണ് ഈ സര്‍ക്കാരിന്റെ കാലത്തുണ്ടായ ആദ്യസംഭവം. തീവ്ര ഇടത് സംഘടനകളേക്കാള്‍ രൂക്ഷമായ ഭാഷയില്‍ അന്ന് പൊലിസിനും തണ്ടര്‍ബോള്‍ട്ടിനുമെതിരേ ആഞ്ഞടിച്ച് സി.പി.ഐ രംഗത്തെത്തിയത് സര്‍ക്കാരിനെ പ്രതിസന്ധിയിലാക്കിയിരുന്നു. മാവോവാദികളെ ഉന്‍മൂലനം ചെയ്യുന്നത് പരിഷ്‌കൃത സമൂഹത്തിന് ചേര്‍ന്നതല്ലെന്ന സി.പി.ഐ സംസ്ഥാന സെക്രട്ടറി കാനം രാജേന്ദ്രന്റെ പ്രസ്താവന അന്ന് ഏറെ ചര്‍ച്ചയായിരുന്നു. ഇതിനുപിന്നാലെ കരുളായി വനത്തിലേത് വ്യാജ ഏറ്റുമുട്ടലാണെന്ന് ആരോപിച്ച് പാര്‍ട്ടി മുഖപത്രമായ ജനയുഗം മുഖപ്രസംഗം എഴുതി സര്‍ക്കാരിനെ പ്രതിരോധത്തിലാക്കി.
2019 മാര്‍ച്ച് ആറിന് വയനാട് ലക്കിടിയിലെ സ്വകാര്യ റിസോര്‍ട്ടില്‍ മാവോവാദിയായ സി.പി ജലീല്‍ കൊല്ലപ്പെട്ടപ്പോഴും സി.പി.ഐ ഇതേ നിലപാടാണ് സ്വീകരിച്ചത്.

2019 ഒക്ടോബര്‍ 28ന് പാലക്കാട് മഞ്ചിക്കണ്ടി ഊരില്‍ തണ്ടര്‍ബോള്‍ട്ടിന്റെ വെടിവയ്പ്പില്‍ ശ്രീമതി, സുരേഷ്, കാര്‍ത്തി, മണിവാസകം എന്നിവര്‍ കൊല്ലപ്പെട്ട സംഭവത്തോടെ സി.പി.ഐ പ്രത്യക്ഷ പ്രതിഷേധത്തിലേക്ക് നീങ്ങി. മഞ്ചക്കണ്ടിയിലേത് വ്യാജ ഏറ്റുമുട്ടലാണെന്നും ആശയത്തിന്റെ പേരില്‍ കൊല്ലുന്നത് പ്രാകൃതമാണെന്നുമുള്ള കാനത്തിന്റെ പ്രസ്താവനയ്ക്ക് പിന്നാലെ സംസ്ഥാന അസി. സെക്രട്ടറി പ്രകാശ്ബാബുവിന്റെ നേതൃത്വത്തിലുള്ള സംഘം സംഭവസ്ഥലം സന്ദര്‍ശിച്ചിരുന്നു. ഗുരുതരമായ ആരോപണങ്ങളാണ് സി.പി.ഐ സംഘം സര്‍ക്കാരിനും പൊലിസുമെതിരേ ഉന്നയിച്ചത്. ഏകപക്ഷീയ വെടിവയ്പ്പാണ് നടന്നതെന്നും പൊലിസ് ഭീകരത കമ്യൂണിസ്റ്റ് സര്‍ക്കാരിന് ചേര്‍ന്ന നടപടിയല്ലെന്നും ഇവര്‍ വിമര്‍ശനമുന്നയിച്ചു.

പാര്‍ട്ടിയും മുഖപത്രവും തുടര്‍ച്ചായി സര്‍ക്കാരിനും പൊലിസിനുമെതിരേ രംഗത്തുവന്നത് ഇടതു മുന്നണിയിലും അസ്വാരസ്യങ്ങള്‍ക്ക് ഇടയാക്കിയിരുന്നു.
വയനാട് ബാണാസുര വനത്തിനോട് ചേര്‍ന്ന് ഇന്നലെ നടന്ന ഏറ്റുട്ടല്‍ മരണത്തില്‍ ദുരൂഹത തുടരുമ്പോഴും സി.പി.ഐ നിശബ്ദത പാലിക്കുകയാണ്. കൊല്ലപ്പെട്ടയാളുടെ മൃതദേഹം മാധ്യമങ്ങളെ കാണിക്കാനോ സംഭവ സ്ഥലത്തേക്ക് മാധ്യമപ്രവര്‍ത്തകരെ കടത്തിവിടാനോ തയാറാവാത്ത പൊലിസ് നടപടിയില്‍ സംശയമുളവാക്കുമ്പോഴും പ്രതികരിക്കാന്‍ സി.പി.ഐയും യുവജന സംഘടനയായ എ.ഐ.വൈ.എഫും മടിക്കുന്നു.
അടുത്തമാസം തദ്ദേശ തെരഞ്ഞെടുപ്പും ആറുമാസത്തിനകം നിയമസഭാ തെരഞ്ഞെടുപ്പും നടക്കാനിരിക്കുന്ന സാഹചര്യത്തില്‍ മുന്നണിയെയും സര്‍ക്കാരിനെയും പ്രതിരോധത്തിലാക്കുന്ന നടപടികള്‍ ഘടകകക്ഷികളുടെ ഭാഗത്തുനിന്നുണ്ടാവരുതെന്ന് നേരത്തെ എല്‍.ഡി.എഫില്‍ ധാരണയുണ്ടായിരുന്നു. സി.പി.ഐയുടെ പല നടപടികളും സര്‍ക്കാരിനെ പ്രതിസന്ധിയിലാക്കിയതായി നേരത്തെ മുന്നണിയോഗങ്ങളില്‍ വിമര്‍ശനമുണ്ടായിരുന്നു.