തിരൂരങ്ങാടി: ഖുത്വുബുസ്സമാന്‍ മമ്പുറം സയ്യിദ് അലവി മൗലദ്ദവീല തങ്ങളുടെ 180-ാം ആണ്ടുനേര്‍ച്ചക്ക് ഇന്ന് സമാപനം. കേരളത്തിനകത്തും പുറത്തും നിന്ന്് പതിനായിരങ്ങള്‍ ഇന്നു മമ്പുറത്തേക്ക്് ഒഴുകിയെത്തും.
നേര്‍ച്ചയുടെ ഭാഗമായി ഒരു ലക്ഷം പേര്‍ക്കുള്ള അന്നദാനം രാവിലെ എട്ടുമണി മുതല്‍ ആരംഭിക്കും. സമസ്ത ഉപാധ്യക്ഷന്‍ പാണക്കാട് സയ്യിദ് ഹൈദരലി ശിഹാബ് തങ്ങള്‍ ഉദ്ഘാടനം ചെയ്യും. നേര്‍ച്ചക്കു സമാപനം കുറിച്ച് ഉച്ചക്ക് ഒന്നരക്ക് മഖാമില്‍ നടക്കുന്ന ഖത്മ് ദുആ മജ്‌ലിസിനു സമസ്ത കേരള ജംഇയ്യത്തുല്‍ ഉലമാ പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ നേതൃത്വം നല്‍കും.
ഇന്നലെ വൈകിട്ട് മഖാമില്‍ ദിക്‌റ് ദുആ സമ്മേളനവും ഹാഫിളുമാര്‍ക്കുള്ള സനദ്ദാനവും നടന്നു. സമസ്ത കേന്ദ്ര മുശാവറാംഗം വാവാട് കുഞ്ഞിക്കോയ മുസ്‌ലിയാര്‍ പ്രാര്‍ഥനാ സദസിന് നേതൃത്വം നല്‍കി. കോഴിക്കോട് വലിയ ഖാസി സയ്യിദ് അബ്ദുന്നാസ്വിര്‍ ഹയ്യ് ശിഹാബ് തങ്ങള്‍ പ്രാരംഭ പ്രാര്‍ഥന നടത്തി.
മമ്പുറം തങ്ങളുടെ നാമധേയത്തിലുള്ള ഹിഫ്‌ളുല്‍ ഖുര്‍ആന്‍ കോളജില്‍ നിന്ന് ഖുര്‍ആന്‍ മനഃപാഠമാക്കിയ 33 വിദ്യാര്‍ഥികള്‍ സമസ്ത കേരള ജംഇയ്യത്തുല്‍ ഉലമാ ജനറല്‍ സെക്രട്ടറി കെ.ആലിക്കുട്ടി മുസ്‌ലിയാരില്‍ നിന്ന് ഹാഫിള് പട്ടം ഏറ്റുവാങ്ങി.