റിയാദ്: റിയാദ് മെട്രോ സംവിധാനത്തെ നിരീക്ഷിക്കുന്നതിനായി 10,000 ആധുനിക ക്യാമറകൾ സ്ഥാപിച്ചു. റിയാദ് മെട്രോയിലെ മുഴുവൻ ട്രെയിനുകളിലും ഇത്രയും ക്യാമറകൾ ഉൾപ്പെടുന്ന സംയോജിത നിരീക്ഷണ സംവിധാനം സ്ഥാപിച്ചിട്ടുണ്ടെന്ന് റിയാദ് പൊതുഗതാഗത അതോറിറ്റി ഔദ്യോഗിക വൃത്തങ്ങൾ വ്യക്തമാക്കി.

ഉപയോക്താക്കളുടെ അനുഭവം മെച്ചപ്പെടുത്താനും അവരുടെ സുരക്ഷ നിലനിർത്താനും പൊതുഗതാഗത ശൃംഖല സ്ഥാപനങ്ങളും ട്രെയിനുകളും സംരക്ഷിക്കാനും വേണ്ടിയാണ് ക്യാമരകൾ സ്ഥാപിച്ചിട്ടുള്ളത്. ഞായറാഴ്ച മുതൽ ബ്ലൂ ലൈനിലെ ഡോ. സുലൈമാൻ അൽഹബീബ് സ്റ്റേഷൻ തുറക്കുകയും ട്രെയിനുകൾക്ക് സ്റ്റോപ്പ് അനുവദിക്കുകയും ചെയ്തിട്ടുള്ളതായി വൃത്തങ്ങൾ അറിയിച്ചു.

റിയാദ് മെട്രോ പദ്ധതിയിലെ ആറ് റൂട്ടുകളിൽ മൂന്നെണ്ണം മാത്രമാണ് പ്രവർത്തനം ആരംഭിച്ചിട്ടുള്ളത്. പർപ്പിൾ, യെല്ലോ, ബ്ലൂ എന്നി ലൈനുകളിലാണ് ഇപ്പോൾ സർവിസ് ആരംഭിച്ചിരിക്കുന്നത്. യാദ്-ഖസീം റോഡിലെ കിങ് അബ്ദുല്ല ഫിനാൻഷ്യൽ ഡിസ്ട്രിക്റ്റ് (കെ.എ.എഫ്.ഡി) സ്റ്റേഷനിൽ നിന്നാണ് ആറ് ലൈനുകളും പുറപ്പെടുന്നത്. നാല് പ്രധാന സ്റ്റേഷനുകളിലെ പ്രധാന ഹബ്ബ് ഇതാണ്. 

അവശേഷിക്കുന്ന മൂന്ന് റൂട്ടുകളിൽ ഒരു മാസത്തിനുള്ളിൽ സർവിസ് ആരംഭിക്കും. ഡിസംബർ 15-ന് കിങ് അബ്ദുല്ല റോഡിന് സമാന്തരമായ റെഡ് ലൈനും കിങ് അബ്ദുൽ അസീസ് റോഡിനരികിലൂടെ കടന്നുപോകുന്ന ഗ്രീൻ ലൈനും പ്രവർത്തനമാരംഭിക്കും. അൽമദീന മുനവ്വറ റോഡിലെ ഓറഞ്ച് ലൈൻ 2025 ജനുവരി അഞ്ചിന് പ്രവർത്തനം തുടങ്ങും. ആറ് ട്രെയിൻ ട്രാക്കുകളും പ്രവർത്തിപ്പിക്കുന്നതോടെ പദ്ധതി പൂർത്തിയാവും.

Riyadh Metro has strengthened its security measures by installing a network of 10,000 CCTV cameras to monitor passengers and ensure a safe travel experience.