നിലമ്പൂര്‍: എന്‍ജിന്‍ തകരാര്‍ മൂലം നിലമ്പൂര്‍-ഷൊര്‍ണൂര്‍ പാതയില്‍ ട്രെയിന്‍ മണിക്കൂറോളം വൈകി. ഷൊര്‍ണുരില്‍ നിന്ന് 5:10ന് നിലമ്പൂരിലേക്ക് പുറപ്പെട്ട 56619 പാസഞ്ചര്‍ ട്രെയിനാണ് വൈകിയത്. 5:45ന് അങ്ങാടിപ്പുറം എത്തുന്ന ട്രെയിന്‍ 6.55 നാണ് എത്തിയത്.
ഇതേ തുടര്‍ന്ന് നിലമ്പൂരില്‍ നിന്ന് 5:5ന് പുറപ്പെട്ടു പാലക്കാട് വരെ പോവുന്ന പാസഞ്ചര്‍ ട്രെയിന്‍ അങ്ങാടിപ്പുറം സ്‌റ്റേഷനില്‍ ഒരു മണിക്കൂറിലധികം നിര്‍ത്തിയിട്ടേണ്ടിവന്നു. നിലമ്പൂരില്‍ നിന്ന് ഷൊര്‍ണൂരിലേക്കും ക്കും തിരിച്ചുമുള്ള വണ്ടികള്‍ വൈകുന്നത് ഇപ്പോള്‍ പതിവായിരിക്കുകയാണ്. പല ദിവസങ്ങളിലും ഇത്തരത്തില്‍ വൈകുന്നത് കാരണം പലസ്ഥലങ്ങളിലേക്കും കണക്ഷന്‍ വേണ്ടവര്‍ക്ക് കിട്ടാതെ വരുന്നതും പതിവാണ്.
ഷൊര്‍ണൂരെത്തിയാല്‍ പാലക്കാട്, തൃശൂര്‍, കണ്ണൂര്‍ ഭാഗങ്ങളിലേക്കുള്ള തീവണ്ടി യാത്രക്കക്കാരാണ് ഇത് മൂലം ഏറെ ദുരിതമനുഭവിക്കുന്നത്. വളരെ പഴക്കം ചെന്ന എന്‍ജിനുകളും പഴയ റെയില്‍ പാളങ്ങളുമാണ് നിലമ്പൂര്‍-ഷൊര്‍ണൂര്‍ പാതയില്‍ ഇപ്പോഴും പല സ്ഥലങ്ങളിലും ഉപയോഗിക്കുന്നത് എന്നതിനാലാണ് വണ്ടികള്‍ ഇത്രയും വൈകുന്നതെന്നാണ് വിദഗ്ധാഭിപ്രായം.
പാതയില്‍ ക്രോസിങ് സ്‌റ്റേഷനുകള്‍ കുറവായതിനാല്‍ എല്ലാ സ്‌റ്റേഷനുകളിലും വച്ച് വണ്ടികള്‍ ക്രോസ് ചെയ്യാനും കഴിയില്ല. ഒരു ചെറിയ ചാറ്റല്‍ മഴ വന്നാല്‍പ്പോലും പാതയില്‍ വണ്ടിയുടെ ചക്രം പാളത്തില്‍ നിന്ന് തെറ്റാറുണ്ട്.