തിരുവനന്തപുരം: കെ. ഗോപാലകൃഷ്ണന്‍ ഐ.എ.എസ് സര്‍ക്കാര്‍ ഫയലിലും കൃത്രിമം കാണിച്ചതിന്റെ രേഖകള്‍ പുറത്ത്. പട്ടികജാതി, പട്ടികവര്‍ഗ വകുപ്പിന് കീഴില്‍ രൂപീകരിച്ച കേരള എംപവര്‍മെന്റ് സൊസൈറ്റി 'ഉന്നതി'യിലെ ഫയലുകളില്‍ കൃത്രിമം കാട്ടിയതിന്റെ രേഖകളാണ് പുറത്തുവന്നത്. ഫയല്‍ തിരിമറിയില്‍ അഡീഷനല്‍ ചീഫ് സെക്രട്ടറി ജയതിലകിനും പങ്കുണ്ട്.

ഫയലുകള്‍ കൃത്യമായി കൈമാറിയെന്നാണ് സര്‍ക്കാര്‍ രേഖകള്‍ വ്യക്തമാക്കുന്നത്. എന്നാല്‍, ഇ-ഫയല്‍ ആക്കിയതില്‍ ജയതിലകിന്റെ ഓഫിസില്‍ കൃത്രിമം നടത്തുകയായിരുന്നു. ജൂണ്‍, ജൂലൈ മാസങ്ങളിലായി ഉന്നതിയുടെ ഫയലുകള്‍ കിട്ടിയിട്ടില്ലെന്ന് രണ്ട് കത്തുകള്‍ നല്‍കി. അവയെ അടിസ്ഥാനപ്പെടുത്തിയാണ് ജയതിലക് പ്രശാന്തിനെതിരെ റിപ്പോര്‍ട്ട് ഉണ്ടാക്കുന്നത്. ഓഗസ്റ്റിലാണ് ഫയലുകള്‍ ഇ-ഓഫിസില്‍ അപ്‌ലോഡ് ചെയ്തത്. ഒരേദിവസം ഒരേ സമയം ഫയലുകള്‍ അപ്‌ലോഡ് ചെയ്യുകയായിരുന്നു. എന്നാല്‍ ഈ ഓഫിസ് രേഖകള്‍ പരിശോധിക്കുമ്പോള്‍ ഈ രണ്ടുകത്തുകളും പഴയ ഡേറ്റില്‍ വ്യാജമായി സൃഷ്ടിച്ചതാണെന്ന് മനസിലാകും. 

ഫയല്‍ കിട്ടിയാല്‍ രണ്ട് ദിവസത്തിനകം അപ്‌ലോഡ് ചെയ്യേണ്ടതാണ്. ഇതാണ് ജയതിലകും ഗോപാലകൃഷ്ണനും ഒത്തുകളിച്ച് അട്ടിമറിച്ചത്. രണ്ട് കത്തുകളും ഈ-ഓഫിസില്‍ അപ്ലോഡ് ചെയ്തിരിക്കുന്നത് ജയതിലകിന്റെ ഓഫിസ് നേരിട്ടാണെന്നും ഈ-ഓഫിസ് രേഖകള്‍ കാണിക്കുന്നു. 

എസ്.സി എസ്.ടി വകുപ്പ് കീഴിലുള്ള ഉന്നതിയുമായി ബന്ധപ്പെട്ട ഫയലുകള്‍ മുന്‍ ചുമതലക്കാരന്‍ തനിക്ക് നല്‍കിയില്ല എന്നായിരുന്നു കെ ഗോപാലകൃഷ്ണന്‍ ഐ.എ.എസിന്റെ പരാതി.