കല്‍പ്പറ്റ: ഫോണിലൂടെ അശ്ലീല ചുവയോടെ സംസാരിച്ചു എന്ന യുവതിയുടെ പരാതിയുടെ അടിസ്ഥാനത്തില്‍ സിനിമാ നടന്‍ വിനായകനെ അറസ്റ്റ് ചെയ്‌തേക്കും. യുവതിയുടെ മൊഴി കഴിഞ്ഞ ദിവസം പൊലിസ് രേഖപ്പെടുത്തിയിരുന്നു. തീര്‍ത്തും അരോചകമായ രീതിയില്‍ വിനായകന്‍ തന്നോട് സംസാരിച്ചൂവെന്നായിരുന്നു യുവതിയുടെ മൊഴി.

വിനായകന്‍ സംസാരിച്ച ഫോണ്‍ സംഭാഷണവും യുവതി ഹാജരാക്കിയിരുന്നു. കല്‍പ്പറ്റ പൊലിസാണ് കേസ് രജിസ്റ്റര്‍ ചെയ്തത്. ഐ.പി.സി 506, 294 ബി, കെ.പി.എ120 എന്നീ വകുപ്പുകള്‍ ചുമത്തിയാണ് കേസ് രജിസ്റ്റര്‍ ചെയ്തിരിക്കുന്നത്. ഒരു പരിപാടിക്ക് ക്ഷണിക്കാനായി ഫോണില്‍ ബന്ധപ്പെട്ടപ്പോള്‍ അസഭ്യം പറയുകയും അശ്ലീല ചുവയോടെ സംസാരിച്ചെന്നുമാണ് ദലിത് അക്ടിവിസ്റ്റ് പരാതിപ്പെട്ടത്.

വിനായകനെതിരായ ജാതീയാധിക്ഷേപങ്ങള്‍ സമൂഹമാധ്യമങ്ങളില്‍ ഉയര്‍ന്നപ്പോഴുള്ള പ്രതികരണമായാണ് യുവതി സ്വന്തം അനുഭവം തുറന്നുപറഞ്ഞ് ഫേസ്ബുക്കില്‍ പോസ്റ്റ് ഇട്ടത്.