ഇരിട്ടി: ഭൂരഹിതരായ കര്‍ഷകര്‍ക്ക് പതിച്ചു നല്‍കിയ ഭൂമിയില്‍ അനധികൃതകള്ളുഷാപ്പ് പ്രവര്‍ത്തിക്കുന്നു. നാട്ടുകാരുടെ പരാതിയെത്തുടര്‍ന്ന് ജില്ലാ കലക്ടര്‍ പടിയൂര്‍ പഞ്ചായത്ത് അധികൃതരോട് റിപ്പോര്‍ട്ട് തേടിയിരുന്നു.
തുടര്‍ന്ന് പഞ്ചായത്ത് അധികൃതര്‍ കള്ളുഷാപ്പിന്റെ പ്രവര്‍ത്തനം നിര്‍ത്തിവെക്കാന്‍ നോട്ടിസ് നല്‍കിയെങ്കിലും നടപ്പിലായില്ല. സുപ്രിം കോടതി ഉത്തരവിനെത്തുടര്‍ന്ന് ഇരിട്ടി-തളിപ്പറമ്പ് സംസ്ഥാന പാതയില്‍ നിന്നു നൂറുമീറ്റര്‍ അകലെ പടിയൂര്‍ പുലിക്കാട് റോഡില്‍ പ്രവര്‍ത്തിച്ചു വന്നിരുന്ന ശ്രീകണ്ഠാപുരം റെയ്ഞ്ചിലെ 45ാം നമ്പര്‍ കള്ളുഷാപ്പാണ് പൂവം കല്ല്യാട് റോഡിലെ ഭൂരഹിത കര്‍ഷകര്‍ക്കായി വര്‍ഷങ്ങള്‍ക്ക് മുന്‍പ് പതിച്ചുനല്‍കിയ ഭൂമിയിലെ കെട്ടിടത്തിലേക്ക് മാറ്റിയത്.
ഭൂരഹിതനായ പ്രഭാകരന്‍ എന്നയാള്‍ക്ക് പതിച്ചുകിട്ടിയ ഭൂമിയില്‍ ഗാര്‍ഹികാവശ്യത്തിനായി നിര്‍മിച്ച കെട്ടിടത്തിലാണ് കള്ളുഷാപ്പ് കഴിഞ്ഞ ഏപ്രില്‍ 26 മുതല്‍ അനുമതിയില്ലാതെ പ്രവര്‍ത്തിച്ചുവരുന്നത്. ഇതേ മിച്ചഭൂമിയില്‍ തന്നെ താമസമാക്കിയവരില്‍ നിന്നും പ്രദേശ വാസികളില്‍ നിന്നും നിരവധി പരാതികള്‍ ഉയരുകയും ചിലര്‍ കലക്ടര്‍ക്കു പരാതി സമര്‍പ്പിക്കുകയും ചെയ്തതിനെത്തുടര്‍ന്നാണ് ജില്ലാ കലക്ടര്‍ പടിയൂര്‍ പഞ്ചായത്തിന്റെ റിപ്പോര്‍ട്ട് തേടിയത്.
മെയ് 10നാണ് കള്ളുഷാപ്പിന്റെ പ്രവര്‍ത്തനം നിര്‍ത്തിവെക്കാനായി പഞ്ചായത്ത് സ്റ്റോപ്പ് മെമ്മോ നല്‍കിയത്.
ഇപ്പോഴും പ്രവര്‍ത്തനം തുടരുന്ന കള്ളുഷാപ്പിനെതിരേ ജനകീയ പ്രതിഷേധം ഉയര്‍ത്താനുള്ള ശ്രമത്തിലാണ് നാട്ടുകാര്‍.