നെടുമ്പാശ്ശേരി: സംസ്ഥാന ഹജ്ജ് കമ്മിറ്റി മുഖേന ഈ വര്‍ഷം ഹജ്ജിനു പോയ 8,610 പേര്‍ മടങ്ങിയെത്തി. ഈ മാസം 12 മുതലാണ് ഹാജിമാരുടെ മടക്കയാത്ര ആരംഭിച്ചത്.
പുണ്യഭൂമിയില്‍നിന്ന് ഹാജിമാരുമായി 21 സഊദി എയര്‍ലൈന്‍സ് വിമാനങ്ങളാണ് ഇതുവരെ നെടുമ്പാശ്ശേരിയിലെത്തിയത്. ഇന്നലെ ഉച്ചയ്ക്ക് 11.50നും 1.30നും രണ്ടു വിമാനങ്ങളിലായി 820 പേര്‍ മടങ്ങിയെത്തി. ഇന്നു രാവിലെ 10.35നുള്ള വിമാനത്തില്‍ 154 പേരും ഉച്ചയ്ക്ക് 2.45ന് 410 പേരും നെടുമ്പാശ്ശേരിയിലിറങ്ങും. 154 പേര്‍ സാധാരണ യാത്രാവിമാനത്തില്‍ ജിദ്ദാ വിമാനത്താവളത്തില്‍നിന്നാണു യാത്ര തിരിക്കുന്നത്. നെടുമ്പാശ്ശേരിയില്‍നിന്ന് ജിദ്ദ വിമാനത്താവളം വഴി മക്കയിലെത്തിയവരില്‍ 154 പേര്‍ ഒഴികെയുള്ള എല്ലാവരും മദീന വിമാനത്താവളത്തില്‍നിന്നാണു നാട്ടിലേക്കു മടങ്ങുന്നത്.
30 വിമാനങ്ങളിലായാണ് ഹാജിമാരുടെ മടക്കയാത്ര ക്രമീകരിച്ചിരിക്കുന്നത്. ലക്ഷദ്വീപില്‍നിന്നു യാത്രതിരിച്ച 277 പേര്‍ ഈ മാസം 17നും, മാഹിയില്‍നിന്നുള്ള 47 പേര്‍ 19നും നെടുമ്പാശ്ശേരിയിലെത്തിയിരുന്നു. ലക്ഷദ്വീപില്‍നിന്നുള്ള ഹാജിമാര്‍ കഴിഞ്ഞ മൂന്നു ദിവസങ്ങളിലായി കപ്പലുകളില്‍ കൊച്ചിയില്‍നിന്നു നാട്ടിലേക്കു തിരിച്ചു. ലക്ഷദ്വീപില്‍നിന്നുള്ള അവസാനസംഘം ഹാജിമാര്‍ ഇന്നലെയാണ് കൊച്ചിയില്‍നിന്നു പുറപ്പെട്ടത്.
കേരളം, ലക്ഷദ്വീപ്, മാഹി എന്നിവിടങ്ങളില്‍നിന്നുള്ള 12,013 പേരാണ് ഈ വര്‍ഷം ഹജ്ജിനായി പുറപ്പെട്ടിരുന്നത്. ഇതില്‍ 20 പേര്‍ മക്കയില്‍ മരിച്ചു. 26നു രാത്രി 7.35നാണ് ഹാജിമാരുടെ അവസാനസംഘവുമായി സഊദി എയര്‍ലൈന്‍സ് നെടുമ്പാശ്ശേരിയിലിറങ്ങുക.