ന്യൂഡല്‍ഹി: ഭീകരവാദത്തിന്റെ ഉത്തരവാദിത്വം അവരെ സഹായിക്കുന്ന രാജ്യങ്ങള്‍ക്കാണെന്ന് പ്രധാനമന്ത്രി നരേന്ദ്രമോദി. ബ്രിക്‌സ് രാജ്യങ്ങളുടെ നേതാക്കള്‍ പങ്കെടുക്കുന്ന വെര്‍ച്വല്‍ ഉച്ചകോടിയെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം.

തീവ്രവാദമാണ് ലോകം ഇന്ന് നേരിടുന്ന ഏറ്റവും വലിയ പ്രശ്‌നമെന്ന് ഉച്ചകോടിയെ അഭിസംബോധന ചെയ്തുകൊണ്ട് മോദി പറഞ്ഞു. ഭീകരര്‍ക്ക് പിന്തുണ നല്‍കുന്ന രാജ്യങ്ങളെക്കൊണ്ട് അതിന് ഉത്തരം പറയിക്കണം. ബഹുസ്വരത വെല്ലുവിളികള്‍ നേരിടുകയാണും കൊവിഡ് കാലത്തെ സാമ്പത്തിക പ്രതിസന്ധി മറികടക്കാന്‍ ബ്രിക്‌സ് രാജ്യങ്ങള്‍ ഒന്നിച്ചു നില്‍ക്കണമെന്നും അദ്ദേഹം പറഞ്ഞു.

കേന്ദ്രസര്‍ക്കാറിന്റെ ആത്മനിര്‍ഭര്‍ ഭാരതിനെക്കുറിച്ചും ബ്രിക്‌സ് യോഗത്തില്‍ മോദി സംസാരിച്ചു. കൊവിഡിന് ശേഷം ലോകത്തെ വിതരണശൃംഖലക്കായി വലിയ സംഭാവനകള്‍ നല്‍കാന്‍ ഇന്ത്യയ്ക്ക് സാധിക്കുമെന്നും മോദി വ്യക്തമാക്കി.