കോഴിക്കോട്: കാജുകഡോ കരാട്ടെ ആന്‍ഡ് മാര്‍ഷല്‍ ആര്‍ട്‌സ് അക്കാദമി സംഘടിപ്പിക്കുന്ന 10-ാമത് ഫുള്‍ കോണ്‍ടാക്ട് ഓള്‍ സ്റ്റൈല്‍ മാര്‍ഷല്‍ ആര്‍ട്‌സ് ടൂര്‍ണമെന്റിന് ഇന്‍ഡോര്‍ സ്റ്റേഡിയത്തില്‍ തുടക്കമായി. കേരളം, തമിഴ്‌നാട്, കര്‍ണാടക, ജാര്‍ഖണ്ഡ്, അസം, പശ്ചിമബംഗാള്‍, മഹാരാഷ്ട്ര, ഡല്‍ഹി, രാജസ്ഥാന്‍, മണിപ്പൂര്‍ എന്നീ സംസ്ഥാനങ്ങളില്‍ നിന്നായി 500ല്‍പരം താരങ്ങള്‍ മത്സരത്തില്‍ പങ്കെടുക്കുന്നുണ്ട്.
ഇന്നലെ ആദ്യറൗണ്ട് മത്സരങ്ങള്‍ നടന്നു. ടൂര്‍ണമെന്റ് സംസ്ഥാന സ്‌പോര്‍ട്‌സ് കൗണ്‍സില്‍ പ്രസിഡന്റ് ടി.പി ദാസന്‍ ഉദ്ഘാടനം ചെയ്തു. മുന്‍ കോര്‍പറേഷന്‍ മേയര്‍ എം. ഭാസ്‌കരന്‍ അധ്യക്ഷനായി. എ.കെ ശശീന്ദ്രന്‍ എം.എല്‍.എ, ടി.വി നിര്‍മലന്‍, ടി. സിദ്ദീഖ്, ചന്ദ്രന്‍ മാസ്റ്റര്‍, എന്‍.സി അബൂബക്കര്‍, ടി.വി ബാലന്‍, മുക്കം മുഹമ്മദ്, മനയത്ത് ചന്ദ്രന്‍, കെ. ലോഹ്യ സംബന്ധിച്ചു. പി.കെ ജയരാജന്‍ സ്വാഗതവും കിരണ്‍കുമാര്‍ നന്ദിയും പറഞ്ഞു. ടൂര്‍ണമെന്റ് 21ന് സമാപിക്കും.