അന്തിക്കാട്: മുറ്റിച്ചൂര്‍ പാലത്തിലെ ഹൈമാസ്റ്റ് ലൈറ്റ് മിഴിയിടച്ചത് നാട്ടുകാര്‍ക്കും യാത്രക്കാര്‍ക്കും ദുരിതമായി. പാലത്തിന്റെ ഇരു വശങ്ങളിലുമായി 24 ലൈറ്റുകളാണ് സ്ഥാപിച്ചിട്ടുള്ളത്.
ഇവ കത്താത്തതിനാല്‍ പാലത്തിലൂടെയുള്ള രാത്രിയാത്ര ദുരിതമായി. ദിവസവും നൂറുകണക്കിന് വാഹനങ്ങളും യാത്രക്കാരും ആശ്രയിക്കുന്ന പാലമാണിത്. ലൈറ്റുകള്‍ കത്താത്തതിനാല്‍ രാത്രിയില്‍ സാമൂഹിക വിരുദ്ധരുടെ ശല്യമേറി.
പാലത്തിനു മുകളില്‍ മദ്യപാനവും പ്രദേശത്തെ വീട്ടുകളില്‍ നിന്ന് കോഴി മോഷണവും പതിവായി. രാത്രിയില്‍ പാലം കേന്ദ്രീകരിച്ച് കഞ്ചാവ് വില്‍പനയും നടക്കുന്നുണ്ടെന്ന് സമീപവാസികള്‍ പറഞ്ഞു. മുന്‍പ് ഓട്ടോമാറ്റിക് സിസ്റ്റത്തിലൂടെയായിരുന്നു പാലത്തിലെ ലൈറ്റുകള്‍ പ്രവര്‍ത്തിച്ചിരുന്നത്. ഇത് തകരാറിലായതോടെ കെ.എസ്.ഇ.ബി അധികൃതരെത്തി ലൈറ്റുകള്‍ കത്തിക്കുകയാണ് ചെയ്യുന്നത്.
ഇവരെ നിരവധി തവണ വിവരമറിയിച്ചെങ്കിലും നടപടിയൊന്നും ഉണ്ടായില്ലെന്ന് നാട്ടുകാര്‍ പരാതിപ്പെട്ടു. പാലത്തിലെ മിഴിയടച്ച ഹൈമാസ്റ്റ് ലൈറ്റുകള്‍ കത്തിക്കാന്‍ അധികൃതര്‍ ഉടന്‍ നടപടി സ്വീകരിക്കണമെന്ന് നാട്ടുകാര്‍ ആവശ്യപ്പെട്ടു.