ഹരിപ്പാട്: കഴിഞ്ഞ ദിവസമുണ്ടായ കാറ്റിലും ശക്തമായ മഴയിലും വീയപുരം ചെറുതന പഞ്ചായത്തുകളിലെ  വിവിധ പ്രദേശങ്ങളില്‍ നിരവധി കര്‍ഷകരുടെ ഏത്തവാഴ കൃഷി നശിച്ചു.
വീയപുരം രണ്ടാം വാര്‍ഡില്‍ വാഴകൃയിറക്കിയ ചെറുതന പോച്ച മുപ്പത്തിനാലില്‍ ചിറയില്‍ പുത്തന്‍ പുരയില്‍ അബ്ദുല്‍ ലത്തീഫിന്റെ എഴുപത്തിയഞ്ചോളം കുലച്ച ഏത്ത വാഴകളും,  വീയപുരം രണ്ടാം വാര്‍ഡില്‍ പുത്തന്‍പറമ്പില്‍ സോമന്റെ മുപ്പതോളം വാഴകളും ചെറുതന നിതീഷ് ഭവനത്തില്‍ ദയാനന്ദന്‍, മങ്കോട്ടച്ചിറയില്‍ സതീശന്‍ എന്നിവരുടെ ഇരുപത്തിയഞ്ചോളം വാഴകള്‍ വീതവുമാണ് കാറ്റില്‍ ഒടിഞ്ഞു വീണത്.
ഇതിനു പുറമെ നൂറു കണക്കിനു പാളയംതോടന്‍, ഞാലിപ്പൂവന്‍, റോബസ്റ്റാ വാഴകളും നശിച്ചിട്ടുണ്ട്. ഓണ വിപണി ലക്ഷ്യമിട്ട് ഒരു സീസന്റെ പ്രതീക്ഷയില്‍ ഇറക്കിയ കൃഷിയാണ് കര്‍ഷകര്‍ക്ക് ഇരുട്ടടിയായി തകര്‍ന്നടിഞ്ഞത്. അധികം വാഴകളും  കുലച്ചു വരുന്ന അവസ്ഥയിലായിരുന്നു.  ഒരു വാഴയ്ക്ക് ശരാശരി 250 രൂപ വരെ ചിലവ് വന്നിട്ടുണ്ടെന്നു കര്‍ഷകര്‍ പറയുന്നു. ചെറുകിട കര്‍ഷകരില്‍ അധികംപേരും വിള ഇന്‍ഷുര്‍ ചെയ്യാത്തവരാണ്. 50 വാഴയ്ക്ക് മുകളിലുണ്ടെങ്കിലേ കൃഷിഭവനില്‍ ഇന്‍ഷുര്‍ ചെയ്യാന്‍ പറ്റൂ എന്നും അതിനാല്‍ അധിക കര്‍ഷകരും ഇതിനു മിനക്കെടാറില്ലെന്നുമാണ് കര്‍ഷകരുടെ വളിപ്പെടുത്തല്‍.
മാത്രമല്ല മറ്റ് വാഴകള്‍ക്കൊന്നും ഇന്‍ഷുര്‍ ചെയ്യറുമില്ല. പാട്ടകൃഷി ചെയ്യുന്ന കര്‍ഷകരും ധാരാളമുണ്ട്.  വാഴ ഒന്നിന് 4 രൂപയാണ് ഇന്‍ഷുറന്‍സ് പ്രീമിയം അടക്കേണ്ടത്. ഒരു വാഴയ്ക്ക് 150 രൂപയുടെ പരിരക്ഷയായിരുന്നു ലഭിച്ചിരുന്നത്.
അത് മുന്നൂറായി ഉയര്‍ത്തി പ്രഖ്യാപനം വന്നെങ്കിലും തുടര്‍ നടപടികളൊന്നും ആയില്ലെന്നും കര്‍ഷകര്‍ പറയുന്നു. കൃഷി നശിച്ച കര്‍ഷകര്‍ക്ക് അടിയന്തിരമായി നഷ്ടപരിഹാരം നല്‍കണമെന്നു കര്‍ഷകര്‍ ആവശ്യപ്പെട്ടു.