അരീക്കോട്: പാണക്കാട് ഹൈദരലി ശിഹാബ് തങ്ങളെ സാമൂഹ്യമാധ്യമങ്ങള്‍ വഴി അപകീര്‍ത്തിപ്പെടുത്താന്‍ ശ്രമിച്ച സി.പി.എം പ്രവര്‍ത്തകനെ അരീക്കോട് പൊലിസ് അറസ്റ്റു ചെയ്തു. അരീക്കോട് താഴത്തങ്ങാടിയിലെ നാലകത്ത് ഷൗക്കത്താണ് പൊലിസിന്റെ പിടിയിലായത്.
ഹൈദരലി തങ്ങളുടേയും സിനിമാ താരത്തിന്റെയും ചിത്രം മോര്‍ഫ് ചെയ്ത് അടിസ്ഥാന രഹിതമായ കാര്യങ്ങള്‍ പ്രചരിപ്പിച്ച് രാഷ്ട്രീയ സാമുദായിക ചേരിതിരിവിന് ശ്രമിച്ച സി.പി.എം പ്രവര്‍ത്തകനെതിരേ നടപടി ആവശ്യപ്പെട്ട് യൂത്ത്‌ലീഗ് ജില്ലാ ജന. സെക്രട്ടറി കെ.ടി അഷ്‌റഫ്, ഏറനാട് മണ്ഡലം വൈസ്പ്രസിഡന്റും അരീക്കോട് പഞ്ചായത്ത് അംഗവുമായ ഉമര്‍ വെള്ളേരി എന്നിവര്‍ നല്‍കിയ പരാതിയുടെ അടിസ്ഥാനത്തിലാണ് പ്രതിയെ അറസ്റ്റു ചെയ്തത്.