തിരുവനന്തപുരം: അന്താരാഷ്ട്ര വിമാനത്താവളം കേന്ദ്രീകരിച്ചുള്ള സ്വര്‍ണക്കടത്ത് കേസിലെ പ്രതികളുടെ വീടുകളില്‍ സി.ബി.ഐ റെയ്ഡ്. കസ്റ്റംസ് സൂപ്രണ്ട് വി.രാധാകൃഷ്ണന്‍, അഡ്വ.ബിജു മോഹന്‍, വിഷ്ണു സോമസുന്ദരം എന്നിവരുടെ തിരുവനന്തപുരത്തെ വീടുകളിലാണ് ഇന്നലെ സി.ബി.ഐ കൊച്ചി യൂനിറ്റ് പരിശോധന നടത്തിയത്.

സ്വര്‍ണക്കടത്ത് കേസില്‍ രാധാകൃഷ്ണനെ ഒന്നാം പ്രതിയാക്കി കോടതിയില്‍ സി.ബി.ഐ റിപ്പോര്‍ട്ട് സമര്‍പ്പിച്ചിരുന്നു. ഡി.ആര്‍.ഐയാണ് സ്വര്‍ണം പിടികൂടിയതെങ്കിലും കസ്റ്റംസ് ഉദ്യോഗസ്ഥര്‍ ഉള്‍പ്പെട്ട കേസായതിനാലാണ് സി.ബി.ഐയും അന്വേഷണം നടത്തുന്നത്. സംഭവത്തില്‍ കൂടുതല്‍ കസ്റ്റംസ് ഉദ്യോഗസ്ഥര്‍ ഉള്‍പ്പെട്ടിട്ടുള്ളതായാണ് സി.ബി.ഐയുടെ സംശയം. അതേസമയം, വിദേശത്തേക്ക് അന്വേഷണം വ്യാപിപ്പിക്കാനുള്ള ഒരുക്കത്തിലാണ് സി.ബി.ഐ

പ്രതികളുടെ വീടുകളില്‍നിന്ന് കേസുമായി ബന്ധപ്പെട്ട രേഖകള്‍ സി.ബി.ഐ പിടിച്ചെടുത്തു. വിഷ്ണു സോമസുന്ദരത്തിന്റെ വീട്ടില്‍ അനധികൃതമായി സൂക്ഷിച്ചിരുന്ന 20ലധികം വിദേശ മദ്യക്കുപ്പികളും സി.ബി.ഐ കണ്ടെത്തി. പരിശോധനയ്ക്കു ശേഷം മദ്യക്കുപ്പികള്‍ എക്‌സൈസിനു കൈമാറി. സംഭവത്തില്‍ വിഷ്ണുവിനെതിരേ കേസെടുത്തിട്ടുണ്ട്. ബുധനാഴ്ച ഒരേസമയത്താണ് പ്രതികളുടെ വീടുകളില്‍ സി.ബി.ഐ റെയ്ഡ് തുടങ്ങിയത്.