തിരുവനന്തപുരം: ബാര്‍ കോഴയുമായി ബന്ധപ്പെട്ട് പ്രതിപക്ഷ നേതാവ് രമേശ് ചെന്നിത്തല ഉള്‍പ്പെടെയുള്ളവര്‍ക്ക് പണം നല്‍കിയിരുന്നുവെന്ന ബിജു രമേശിന്റെ വെളിപ്പെടുത്തലിനെ തള്ളി ബാറുടമകളുടെ സംഘടന. ഉടമകളോ സംഘടനയോ ആര്‍ക്കും പണം പിരിച്ച് നല്‍കിയിട്ടില്ലെന്നും ബിജു രമേശിന്റെ നിലപാടുകള്‍ക്ക് സ്ഥിരതയില്ലെന്നും ബാറുടമകളുടെ സംഘടനയായ ഫെഡറേഷന്‍ ഓഫ് കേരള ഹോട്ടല്‍ അസോസിയേഷന്‍ പ്രതിനിധികള്‍ മാധ്യമങ്ങളോട് പ്രതികരിച്ചു.
ബാര്‍ ലൈസന്‍സ് ഫീസ് കുറയ്ക്കാന്‍ പ്രതിപക്ഷ നേതാവ് രമേശ് ചെന്നിത്തല, മുന്‍മന്ത്രി കെ. ബാബു, വി.എസ് ശിവകുമാര്‍ എം.എല്‍.എ തുടങ്ങിയവര്‍ക്ക് കോഴ നല്‍കിയെന്നായിരുന്നു ബിജു രമേശിന്റെ വെളിപ്പെടുത്തല്‍. ബാറുടമകളുടെ സംഘടനയുടെ നേതൃത്വത്തില്‍ ഉടമകളില്‍ നിന്ന് പണം പിരിച്ച് നല്‍കിയെന്നാണ് ബിജു രമേശ് പറഞ്ഞിരുന്നത്. എന്നാല്‍ ഈ വാദം സംഘടന നേതാക്കള്‍ പൂര്‍ണമായും തള്ളി.