കോഴിക്കോട്: പുതിയ ബസ് സ്റ്റാന്‍ഡില്‍ ഓവുചാല്‍ പൊട്ടിയൊലിക്കുന്നത് യാത്രക്കാര്‍ക്ക് ദുരിതമാവുന്നു. ബസ് സ്റ്റാന്‍ഡ് കവാടത്തില്‍ സിറ്റി ബസുകള്‍ നിര്‍ത്തുന്ന സ്റ്റോപ്പിലേക്ക് പോകുംവഴിയിലാണ് ഓവുചാല്‍ പൊട്ടിയൊലിക്കുന്നത്. ഇതില്‍നിന്ന് പുറത്തേക്കുവരുന്ന മലിന ജലവും രൂക്ഷ ദുര്‍ഗന്ധവും മൂലംയാത്രികര്‍ പ്രയാസപ്പെടുകയാണ്.
കോര്‍പറേഷന്റെ അശാസ്ത്രീയമായ ഓവുചാല്‍ നിര്‍മാണമാണ് മലിനജലം പുറത്തേക്കൊഴുകാന്‍ കാരണം. രണ്ടു ഭാഗത്തെയും ഓടകള്‍ ബന്ധിക്കുന്നിടത്ത് കൊട്ടിയടച്ചതിനാല്‍ മാലിനജലം അവിടെത്തന്നെ കെട്ടിക്കിടന്ന് പുറത്തേക്ക് ഒഴുകിക്കൊണ്ടിരിക്കുകയാണ്.
ആറു മാസത്തോളം നീണ്ടുനിന്ന നിര്‍മാണ പ്രവര്‍ത്തനങ്ങള്‍ക്കൊടുവിലാണ് ഇവിടെ ഓവുചാല്‍ യാഥാര്‍ഥ്യമായത്. ഇതിനായി മാസങ്ങളോളം ഇതുവഴിയുള്ള യാത്രപോലും തടഞ്ഞിരുന്നു.