കല്ലമ്പലം: മറ്റ് സ്‌കൂളുകള്‍ക്ക് മാതൃകയാക്കാവുന്ന പ്രവര്‍ത്തനങ്ങളാണ് ഞെക്കാട് സ്‌കൂളില്‍ നടന്നു കൊണ്ടിരിക്കുന്നതെന്നും അതിനുള്ള അംഗീകാരമാണ് പ്രഥമാധ്യാപകന്‍ കെ.കെ സജീവിന് ലഭിച്ച സംസ്ഥാന ഗവണ്‍മെന്റിന്റെ അധ്യാപക അവാര്‍ഡ് എന്നും ഡോ. എ. സമ്പത്ത് എം.പി പറഞ്ഞു.
ഞെക്കാട് ഗവ. വൊക്കേഷനല്‍ ഹയര്‍ സെക്കന്‍ഡറി സ്‌കൂളില്‍ സംസ്ഥാന അധ്യാപക അവാര്‍ഡ് നേടിയ സ്‌കൂള്‍ ഹെഡ്മാസ്റ്ററെ അനുമോദിക്കാന്‍ ചേര്‍ന്ന യോഗം സ്‌കൂള്‍ ഓഡിറ്റോറിയത്തില്‍ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. തിരുവനന്തപുരം ജില്ലാ പഞ്ചായത്ത് വിദ്യാഭ്യാസ ആരോഗ്യ സ്റ്റാന്‍ഡിങ് കമ്മിറ്റി ചെയര്‍മാന്‍ വി. രഞ്ജിത് അധ്യക്ഷനായി. അഡ്വ. വി. ജോയ് എം.എല്‍.എ മുഖ്യപ്രഭാഷണം നടത്തി.
എസ്.എസ്.എ ഫണ്ടുപയോഗിച്ച് നിര്‍മ്മിച്ച ക്ലാസ് മുറികളുടെ ഉദ്ഘാടനം തിരുവനന്തപുരം ജില്ലാ പഞ്ചായത്ത് പ്രസിഡന്റ് വി.കെ മധു നിര്‍വഹിച്ചു. വര്‍ക്കല ബ്ലോക്ക് പഞ്ചായത്ത് പ്രസിഡന്റ് എം.കെ യൂസഫ്, ഒറ്റൂര്‍ പഞ്ചായത്ത് പ്രസിഡന്റ് ആര്‍. സുഭാഷ്, വര്‍ക്കല ബ്ലോക്ക് പഞ്ചായത്ത് വൈസ് പ്രസിഡന്റ് സ്മിതാ സുന്ദരേശന്‍, ഒറ്റൂര്‍ പഞ്ചായത്ത് വിദ്യാഭ്യാസ സ്റ്റാന്‍ഡിങ് കമ്മിറ്റി ചെയര്‍പേഴ്‌സണ്‍ പ്ര മീളാചന്ദ്രന്‍, മെംബറും വിദ്യാലയ വികസന സമിതി ചെയര്‍മാനുമായ എന്‍. അജി, എസ്.എസ്.എ ജില്ലാ പ്രോജക്ട് ഓഫിസര്‍ ബി. ശ്രീകുമാരന്‍, ബ്ലോക്ക് പ്രോജക്ട് ഓഫിസര്‍ പി. സജി, എസ്.എം.സി ചെയര്‍മാര്‍ എ. ജയപ്രകാശ്, വി.എച്ച്.എസ്.എസ് പ്രിന്‍സിപ്പല്‍ എം.ആര്‍ മധു, വികസന സമിതി വര്‍ക്കിങ് ചെയര്‍മാന്‍ വി. സത്യരാജന്‍, സ്റ്റാഫ് സെക്രട്ടറി മുഹമ്മദ് ഉല്ലാസ് സംബന്ധിച്ചു.
പ്രിന്‍സിപ്പല്‍ ആര്‍.പി ദിലീപ് സ്വാഗതവും പി.ടി.എ പ്രസിഡന്റ് കെ. ഷാജികുമാര്‍ കൃതഞ്ജതയും രേഖപ്പെടുത്തി. ഇരുപതോളം സംഘടനകളും വ്യക്തികളം ആദരിക്കല്‍ ചടങ്ങില്‍ പങ്കാളികളായി. സ്‌കൂളിലെ മികച്ച പ്രവര്‍ത്തനങ്ങള്‍ പരിഗണിച്ചാണ് ഹെഡ്മാസ്റ്റര്‍ കെ.കെ സജീവിന് ഈ വര്‍ഷത്തെ സംസ്ഥാന അധ്യാപക അവാര്‍ഡ് ലഭിച്ചത്.
ഡോ. എ. സമ്പത്ത് എം.പി പ്രത്യേക ഉപഹാരം സമ്മാനിച്ചു. നേട്ടങ്ങള്‍ക്കു പിന്നില്‍ അധ്യാപകര്‍, പി.ടി.എ, വികസന സമിതി, പൂര്‍വ വിദ്യാര്‍ഥികള്‍, വിദ്യാലയത്തെ സ്‌നേഹിക്കുന്ന നാട്ടുകാര്‍ തുടങ്ങിയവരുടെ കൂട്ടായ്മയുടെ വിജയമാണെന്ന് പൂര്‍വ വിദ്യാര്‍ഥികൂടിയായ പ്രഥമാധ്യാപകന്‍ കൂട്ടി ചേര്‍ത്തു.