കൊച്ചി: ഹേമ കമ്മിറ്റി റിപ്പോര്‍ട്ടില്‍ പ്രത്യേക നോഡല്‍ ഓഫീസറെ നിയമിക്കാന്‍ പ്രത്യേക അന്വേഷണ സംഘത്തിന് ഹൈക്കോടതിയുടെ നിര്‍ദേശം. പരാതിക്കാര്‍ നേരിടുന്ന അധിക്ഷേപങ്ങള്‍ നോഡല്‍ ഓഫിസറെ അറിയിക്കാം. കേസുമായി ബന്ധപ്പെട്ട അന്വേഷണ പുരോഗതി അന്വേഷണ സംഘം നേരിട്ടു ഹാജരായി കോടതിയില്‍ സമര്‍പ്പിച്ചു. 

മൊഴി നല്‍കിയവര്‍ക്ക് ഭീഷണിയുണ്ടെന്ന് ഡബ്യുസിസി അറിയിച്ചതിനെ തുടര്‍ന്നാണ് ഹൈക്കോടതിയുടെ നിര്‍ദേശം. പരാതിക്കാര്‍ക്ക് എല്ലായ്പ്പോഴും എസ്‌ഐടി അംഗങ്ങളെ ബന്ധപ്പെടാന്‍ സാധിക്കണമെന്നില്ല. ഈ സാഹചര്യത്തില്‍ ഇവരുടെ പ്രശ്‌നം പരിഹരിക്കാന്‍ മാര്‍ഗമുണ്ടാകണമെന്ന് ഡബ്ല്യൂസിസി ആവശ്യപ്പെട്ടു. തുടര്‍ന്നാണ് എസ്‌ഐടിയോട് നോഡല്‍ ഓഫിസറെ നിയോഗിക്കാന്‍ ഹൈക്കോടതി നിര്‍ദ്ദേശിച്ചത്. ഭീഷണി സന്ദേശങ്ങള്‍ ലഭിച്ചാല്‍ പരാതിക്കാര്‍ക്ക് നോഡല്‍ ഓഫിസറെ അറിയിക്കാം. ലഭിക്കുന്ന പരാതികള്‍ നോഡല്‍ ഓഫിസര്‍ അന്വേഷണ സംഘത്തിന് കൈമാറും.