തിരുവനന്തപുരം: ജയിലില്‍ കഴിയുന്നതിനിടെ സ്വപ്ന സുരേഷിന്റെ ശബ്ദ രേഖ പുറത്തുവന്ന സംഭവത്തില്‍ ഇനിയും അവരുടെ മൊഴി രേഖപ്പെടുത്തിയില്ല. ഏറെ വിവാദമാവുകയും സര്‍ക്കാരും ജയില്‍ വകുപ്പും പ്രതിക്കൂട്ടിലായ സംഭവത്തിലാണിപ്പോഴും അനിശ്വിതത്വം. ജുഡിഷ്യല്‍ കസ്റ്റഡയില്‍ കഴിയുന്ന കൊഫപോസ പ്രതിയാണ് സ്വപ്‌ന. അതുകൊണ്ടുതന്നെ സ്വപ്നയുടെ മൊഴി രേഖപ്പെടുത്താന്‍ ജയില്‍ വകുപ്പ് കൊച്ചി എന്‍.ഐ.എ കോടതിയുടെയും കസ്റ്റംസിന്റെയും അനുമതി തേടിയിട്ടുണ്ട്.

സ്വപ്‌നയുടെ കസ്റ്റഡി കാലാവധി കഴിഞ്ഞ് ക്രൈംബ്രാഞ്ച് നേരിട്ട് കോടതിയില്‍ നിന്ന് അനുമതി വാങ്ങണമെന്ന നിലപാടാണ് കസ്റ്റംസിനുള്ളത്. അവര്‍ ഇപ്പോള്‍ കസ്റ്റഡിയില്‍ ആയതിനാലാണ് അനുമതി നല്‍കാത്തതെന്നും കസ്റ്റംസ് വിശദീകരിക്കുന്നു.

സ്വപ്നയുടെ മൊഴി രേഖപ്പെടുത്തണമെന്ന ക്രൈംബ്രാഞ്ചിന്റെ ആവശ്യത്തിലാണ് ജയില്‍ വകുപ്പ് കസ്റ്റംസിന്റെ അനുമതി തേടിയിരുന്നത്. കസ്റ്റംസ് നല്‍കിയ മറുപടി ജയില്‍ വകുപ്പ് ക്രൈംബ്രാഞ്ചിനെ അറിയിക്കുകയും ചെയ്തിട്ടുണ്ട്.