ബദിയഡുക്ക: മുഗു സര്‍വിസ് സഹകരണ ബാങ്ക് തട്ടിപ്പുമായി ബന്ധപ്പെട്ട് കേസെടുക്കാന്‍ വിജിലന്‍സ് കോടതി നിര്‍ദേശം നല്‍കിയിട്ടും നടപടിയെടുക്കാന്‍ കൂട്ടാക്കാത്ത അധികൃതരുടെ നിലപാടില്‍ പ്രതിഷേധിച്ച് ആക്ഷന്‍ കമ്മിറ്റിയുടെ നേതൃത്വത്തില്‍ ബാങ്കിലേക്ക് മാര്‍ച്ച് നടത്തി.
ബാങ്കില്‍ നടന്ന തട്ടിപ്പുമായി ബന്ധപ്പെട്ട് മെമ്പര്‍മാരില്‍ ചിലര്‍ ആക്ഷന്‍ കമ്മിറ്റി രുപീകരിച്ച് വിജിലന്‍സ് കോടതിയില്‍ പരാതി സമര്‍പ്പിച്ചിരുന്നു. ഇതിന്റെ അടിസ്ഥാനത്തില്‍ നടത്തിയ അന്വേഷണ റിപ്പോര്‍ട്ടിന്മേല്‍ ആരോപണവിധേയര്‍ക്കെതിരേ കേസെടുക്കാന്‍ തലശ്ശേരി വിജിലന്‍സ് കോടതി കഴിഞ്ഞ തിങ്കളാഴ്ച ഉത്തരവ് പുറപ്പെടുവിച്ചിരുന്നു.
കേസെടുക്കാന്‍ കോടതി ഉത്തരവിട്ട സാഹചര്യത്തില്‍ ആരോപണവിധേയരാവര്‍ തല്‍സ്ഥാനങ്ങളില്‍നിന്നു മാറിനില്‍ക്കണമെന്നടക്കമുള്ള ആവശ്യങ്ങള്‍ ഉന്നയിച്ചായിരുന്നു മാര്‍ച്ച്. ആരോപണവിധേയര്‍ തല്‍സ്ഥാനങ്ങളില്‍ തുടരുന്നതു ശരിയല്ലെന്നും അവരെ നീക്കം ചെയ്യണമെന്നും ആക്ഷന്‍ കമ്മിറ്റി ആവശ്യപ്പെട്ടു.
മുഗു സര്‍വിസ് സഹകരണ ബാങ്ക് പള്ളം ബ്രാഞ്ചിലേക്ക് നടത്തിയ മാര്‍ച്ചിന് മഞ്ചേശ്വരം ബ്ലോക്ക് പഞ്ചായത്ത് പ്രസിഡന്റ് എ.കെ.എം അഷറഫ് ഉദ്ഘാടനം ചെയ്തു. ഇ.കെ മുഹമ്മദ് കുഞ്ഞി അധ്യക്ഷനായി. ഇ.കെ.എം റഹീം, റഹീംമൂല, സത്താര്‍, മുഹമ്മദ് അഷറഫ് നേതൃത്വം നല്‍കി.