മാവൂര്‍: കഴിഞ്ഞ ദിവസം രാത്രി എട്ടോടെയുണ്ടായ മിന്നലില്‍ മാവൂരിലും പരിസര പ്രദേശങ്ങളിലുമായി കനത്തനാശനഷ്ടം. ഒട്ടേറെ വീടുകളുടെ വയറിങ്, മീറ്ററുകള്‍, മേല്‍ക്കൂര, ഭിത്തികള്‍, വൈദ്യുതോപകരണങ്ങള്‍ എന്നിവ മിന്നലേറ്റ് തകര്‍ന്നു. മിന്നലില്‍ താറുമാറായ  വൈദ്യുതിബന്ധം ഇന്നലെ ഉച്ചതിരിഞ്ഞാണ് പുനഃസ്ഥാപിച്ചത്.
നൊച്ചിക്കാട്ട് കടവില്‍ എടവലത്ത് പറമ്പത്ത് മേത്തല്‍ ബാബുവിന്റെ വീടിനാണ് കനത്തനാശനഷ്ടമുണ്ടായത്. മേല്‍ക്കൂരയുടെ ഒരു വശം നിലംപൊത്തുകയും മുഴുവന്‍ ജനലുകളും തകര്‍ന്നു. മീറ്റര്‍ ബോര്‍ഡും  വയറിങും  കത്തി നശിച്ചു.  മുസ്്‌ലിയാരകത്ത്  അബ്ദുറഹ്മാന്റെ  മീറ്ററും സര്‍വിസ് വയറും കത്തിനശിച്ചു. കല്ല്‌വെട്ട് കുഴിയില്‍ വിജയലക്ഷ്മിയുടെ വീടിന് വിള്ളലേറ്റു. ടിവി, ഫാന്‍ തുടങ്ങിയ ഉപകരണങ്ങളും വയറിങും കത്തിനശിച്ചു.