ബ്രസീലിയ: കോപ അമേരിക്കയിലെ മൂന്നാമന്‍ ആരാണെന്ന് ഇന്നറിയാം. സെമി ഫൈനലില്‍ ബ്രസീലിനോട് എതിരില്ലാത്ത രണ്ട് ഗോളിന് പരാജയപ്പെട്ട അര്‍ജന്റീനയും പെറുവിനോട് എതിരില്ലാത്ത മൂന്ന് ഗോളിന് പരാജയപ്പെട്ട ചിലിയുമാണ് മൂന്നാം സ്ഥാനത്തിനായി പോരാടുന്നത്. കഴിഞ്ഞ രണ്ട് വര്‍ഷങ്ങളിലും ഫൈനല്‍ കളിച്ച ടീമുകളാണ് അര്‍ജന്റീനയും ചിലിയും. തുടര്‍ച്ചയായ രണ്ട് വര്‍ഷത്തെ ചാംപ്യന്‍മാരായ ചിലിക്ക് അപ്രതീക്ഷിതമായിട്ടായിരുന്നു പെറുവിനെതിരേ കാലിടറിയത്. ബ്രസീലിനെതിരേയുള്ള മത്സരത്തില്‍ അര്‍ജന്റീനയുടെ തോല്‍വിക്ക് കാരണം വാര്‍ ആണെന്ന പരാതിയുമായി മെസ്സി അടക്കമുള്ള താരങ്ങളും പരിശീലകന്‍ സ്‌കൊലാനിയും രംഗത്തെത്തിയിരുന്നു. പതിമൂന്ന് താരങ്ങള്‍ രണ്ട് ഗോളുമായി ഗോള്‍ഡന്‍ ബൂട്ട് പട്ടികയിലുണ്ട്. എന്നാല്‍ ഇതില്‍ ഇന്നത്തെ ചിലി അര്‍ജന്റീന മത്സരത്തിലെ അലക്‌സി സാഞ്ചസ്, എഡ്‌വാര്‍ഡോ വര്‍ഗാസ്, അര്‍ജന്റീനയുടെ ലൗതാറോ മാര്‍ട്ടിനെസ് എന്നിവരാണുള്ളത്. ഇന്നത്തെ മത്സരത്തില്‍ ഇവര്‍ കൂടുതല്‍ ഗോളുകള്‍ കണ്ടെത്തുകയാണെങ്കില്‍ ഒരു പക്ഷെ ഗോള്‍ഡന്‍ ബൂട്ട് പരസ്‌കാരം സ്വന്തമാക്കാം. ബ്രസീലിനെതിരേ അര്‍ജന്റീന പിന്തുടര്‍ന്ന ലൈനപ്പ് തന്നെയായിരിക്കും ഇന്നും പിന്തുടരുക. കാരണം 4-1-2-1-2 ലൈനപ്പില്‍ കളിച്ച എല്ലാ മത്സരത്തിലും അര്‍ജന്റീന മികച്ച പ്രകടനം പുറത്തെടുത്തിരുന്നു. അതേസമയം, പ്രതിരോധത്തിനും തുല്യ പ്രാധാന്യം നല്‍കിയുള്ള 4-3-3 ശൈലിയായിരിക്കും ചിലി പിന്തുടരുക. മൂന്നാം സ്ഥാനമെങ്കിലും നേടി നാട്ടിലേക്ക് മടങ്ങാനുള്ള ഒരുക്കത്തിലാണ് ഇരു ടീമുകളും ഇന്ന് കളത്തിലിറങ്ങുന്നത്.