ജിദ്ദ: സ്വര്‍ണത്തിന്റെയും മറ്റ് അമൂല്യ ലോഹങ്ങളുടെയും കസ്റ്റംസ് തീരുവ ഉയര്‍ത്തിയതോടെ നാട്ടില്‍ സ്വര്‍ണ വില ഉയരുമെങ്കിലും ഗള്‍ഫിലെ സ്വര്‍ണ വിപണിക്ക് ഇതു സഹായകമാകുമെന്ന് വ്യാപാര മേഖല.
പത്തില്‍നിന്ന് പന്ത്രണ്ട് ശതമാനമായാണ് കസ്റ്റംസ് തീരുവ ഉയര്‍ത്തിയത്.
നേരത്തെ തന്നെ ഉയര്‍ന്ന നിലയില്‍ നില്‍ക്കുന്ന സ്വര്‍ണവിലയില്‍ കൂടുതല്‍ വര്‍ധനയാണ് ഇതോടെ ഉണ്ടാകുക. അതിനാല്‍ ഗള്‍ഫ് രാജ്യങ്ങളില്‍നിന്ന് അവധിക്ക് പോകുന്ന പ്രവാസികള്‍ ഇവിടെനിന്നു കൂടുതല്‍ സ്വര്‍ണം വാങ്ങാന്‍ താല്‍പര്യം കാണിക്കുമെന്നാണ് ഗള്‍ഫിലെ സ്വര്‍ണാഭരണ വ്യാപാര മേഖലയുടെ പ്രതീക്ഷ.
കഴിഞ്ഞ ദിവസത്തെ വിലയനുസരിച്ച് യു.എ.ഇയില്‍ ഗ്രാമിന് 161.25 ദിര്‍ഹമാണ് വില. ഏകദേശം 3084 ഇന്ത്യന്‍ രൂപ. നാട്ടില്‍ അതേസമയം ഗ്രാമിന് 3144 രൂപയും മൂന്ന് ശതമാനം ജി.എസ്.ടിയും നല്‍കേണ്ടി വരും.