പതിനഞ്ചോളം ഗ്രാമീണ പാതകളില്‍ ടെന്‍ഡര്‍ കൂടാതെ മുന്‍ വര്‍ഷങ്ങളില്‍ റീ ടാറിങ് നടത്തിയ ശേഷം പിന്നീട് ഇതേ പാതകള്‍ക്കു പണം നീക്കി വച്ച് ടെന്‍ഡര്‍ വിളിക്കുകയും കരാറുകാരെ സഹായിക്കാന്‍ നഗരസഭാ അധികൃതര്‍ ഒത്തുകളിക്കുകയാണെന്നുമാണ് പരാതി
കാസര്‍കോട്: അണങ്കൂര്‍ കൊല്ലമ്പാടി പാതയില്‍ വിജിലന്‍സ് പരിശോധന നടത്തി. കാസര്‍കോട് വിജിലന്‍സ് ഡിവൈ.എസ്.പി ദാമോദരന്റെ നേതൃത്വത്തിലുള്ള സംഘമാണ് പാതയില്‍ പരിശോധന നടത്തിയത്. കാസര്‍കോട് നഗരസഭയുടെ പരിധിയിലുള്ള വിവിധ ഗ്രാമീണ പാതകളില്‍ റീ ടാറിങിന്റെ പേരില്‍ അഴിമതി നടത്തിയെന്ന പരാതിയെ തുടര്‍ന്നാണ് വിജിലന്‍സ് സംഘം പരിശോധന നടത്തിയത്. പതിനഞ്ചോളം ഗ്രാമീണ പാതകളില്‍ ടെന്‍ഡര്‍ കൂടാതെ മുന്‍ വര്‍ഷങ്ങളില്‍ റീ ടാറിങ് നടത്തിയ ശേഷം പിന്നീട് ഇതേ പാതകള്‍ക്കു പണം നീക്കി വച്ച് ടെന്‍ഡര്‍ വിളിക്കുകയും കരാറുകാരെ സഹായിക്കാന്‍ നഗരസഭാ അധികൃതര്‍ ഒത്തുകളിക്കുകയാണെന്നുമാണ് പരാതി.
നഗരസഭാ പരിധിയിലെ പതിനഞ്ചോളം ഗ്രാമീണ പാതകളില്‍ ഈരീതിയില്‍ റീടാറിങും മറ്റു ജോലികളും ചെയ്തതായി പരാതി ലഭിച്ചതിനെ തുടര്‍ന്നാണ് പാത പരിശോധന നടത്തിയതെന്ന് വിജിലന്‍സ് ഡിവൈ.എസ്.പി വ്യക്തമാക്കി. പരാതിയില്‍ പറഞ്ഞ മുഴുവന്‍ പാതകളും പരിശോധന നടത്തിയ ശേഷം തുടര്‍ നടപടികള്‍ സ്വീകരിക്കുമെന്ന് വിജിലന്‍സ് ഉദ്യോഗസ്ഥര്‍ പറഞ്ഞു.
അതേസമയം, ഇപ്പോള്‍ പരിശോധന നടത്തിയ പാതയില്‍ വല്ല അപാകതകളും ഉണ്ടെങ്കില്‍ തന്നെ അവ കണ്ടെത്താന്‍ മാസങ്ങള്‍ കഴിയും. മുന്‍ വര്‍ഷങ്ങളിലെ ബന്ധപ്പെട്ട ഫയലുകള്‍ നഗരസഭയില്‍ നിന്നു കസ്റ്റഡിയില്‍ എടുത്ത് അവ പൂര്‍ണമായി പരിശോധന നടത്തിയ ശേഷം മാത്രമേ പാത നവീകരണ ജോലികളില്‍ നിയമ വിരുദ്ധമായി വല്ലതും നടത്തിയിട്ടുണ്ടോയെന്നു വിജിലന്‍സിന് കണ്ടെത്താന്‍ സാധിക്കുകയുള്ളൂ.
ജില്ലയില്‍ വര്‍ഷങ്ങള്‍ക്കുമുമ്പ് വിവിധ നഗരസഭകളിലും പഞ്ചായത്തുകളിലും ഉള്‍പ്പെടെ ഉയര്‍ന്ന പരാതികളില്‍ വിജിലന്‍സ് പരിശോധന നടന്നിട്ടുണ്ടെങ്കിലും ഇപ്പോഴും അന്വേഷണം ഇഴഞ്ഞു നീങ്ങുന്ന അവസ്ഥയാണുള്ളത്.
നടപടിക്രമങ്ങള്‍ പൂര്‍ത്തിയാകുമ്പോഴേക്കും പല കേസുകളിലും വര്‍ഷങ്ങള്‍ പിന്നിടുന്ന സാഹചര്യമാണ് നിലവിലുള്ളത്.