പനജി: ഇന്ത്യന്‍ താരങ്ങളെ അപമാനിക്കുന്ന തരത്തിലല്ല തന്റെ പ്രസ്താവനയെന്ന് ഈസ്റ്റ് ബംഗാള്‍ പരിശീലകന്‍ റോബി ഫൗളര്‍. ഈസ്റ്റ് ബംഗാളിന്റെ കഴിഞ്ഞ മത്സരത്തിനു ശേഷമുള്ള പ്രസ്താവന വലിയ വിവാദമായിരുന്നു. ഇന്ത്യന്‍ താരങ്ങള്‍ ഇതുവരെ പരിശീലനം കിട്ടാത്തവരെ പോലെയാണ് കളിക്കുന്നതെന്നും ഇവരെ വെച്ച് കളിക്കുക പ്രയാസമാണെന്നും മുംബൈ സിറ്റിയോട് പരാജയപ്പെട്ട ശേഷം ഫൗളര്‍ പറഞ്ഞിരുന്നു. എന്നാല്‍ താന്‍ ഇന്ത്യന്‍ താരങ്ങളെ അപമാനിക്കാന്‍ ഉദ്ദേശിച്ചിട്ടില്ല ഇത്തരം പ്രസ്താവന നടത്തിയതെന്ന് ഫൗളര്‍ വ്യക്തമാക്കി. തന്റെ ടീമിലെ താരങ്ങളെ കുറിച്ചാണ് പറഞ്ഞത്. അവര്‍ക്ക് പരിശീലനം കിട്ടാത്തതിന്റെ പ്രശ്‌നം ഉണ്ടണ്ടെന്നും കൂടുതല്‍ നല്ല കോച്ചിങ് കിട്ടിയാലെ അവര്‍ മെച്ചപ്പെടൂ എന്നുമാണ് താന്‍ ഉദ്ദേശിച്ചതെന്ന് ഫൗളര്‍ പറഞ്ഞു. ഇന്ത്യന്‍ താരങ്ങള്‍ക്ക് എതിരേ തനിക്ക് യാതൊരു മുന്‍ വിധികളും ഇല്ല. ഇവിടെ നല്ല താരങ്ങള്‍ ഉണ്ട്. എന്നാല്‍ മെച്ചപ്പെട്ട പരിശീലനങ്ങള്‍ കിട്ടിയാല്‍ അവരുടെ മികവ് കൂടും അതിനാണ് താനും ശ്രമിക്കുന്നതെന്ന് ഫൗളര്‍ വ്യക്തമാക്കി.