തൃശൂര്‍: കലാഭവന്‍ മണിയുടെ മരണം സി.ബി.ഐക്കു വിടാന്‍ സര്‍ക്കാര്‍ വിജ്ഞാപനം ഇറക്കിയിരുന്നതായി ആഭ്യന്തരസെക്രട്ടറിയുടെ വിശദീകരണം. ഇതു സംബന്ധിച്ച് നടപടികള്‍ സ്വീകരിക്കാന്‍ കേന്ദ്രത്തോട് ആവശ്യപ്പെട്ടിട്ടുണ്ട്. ജൂണ്‍ പത്തിനാണ് സി.ബി.ഐ അന്വേഷണത്തിന് സംസ്ഥാന സര്‍ക്കാര്‍ വിജ്ഞാപനമിറക്കിയതെന്നും ആഭ്യന്തര സെക്രട്ടറി വ്യക്തമാക്കി.
സി.ബി.ഐ അന്വേഷണ ഉത്തരവു പുറപ്പെടുവിക്കാന്‍ സര്‍ക്കാര്‍ വൈകുന്നുവെന്ന മണിയുടെ സഹോദരന്‍ ആര്‍.എല്‍.വി രാമകൃഷ്ണന്റെ പരാതിയില്‍ കമ്മിഷന്‍ ആഭ്യന്തര സെക്രട്ടറിയോടു വിശദീകരണം തേടിയിരുന്നു. കേസില്‍ ഇതുവരെയുള്ള അന്വേഷണ പുരോഗതിയടങ്ങുന്ന വിശദമായ റിപ്പോര്‍ട്ട് ചാലക്കുടി ഡിവൈ.എസ്.പി കമ്മിഷനു മുന്നില്‍ ഹാജരാക്കി. സെപ്തംബര്‍ ഏഴിന് നടക്കുന്ന സിറ്റിങില്‍ ഇത് പരിഗണിക്കും. മണിയുടെ മരണം കൊലപാതകമോ ആത്മഹത്യയോ എന്ന് കണ്ടെത്താന്‍ ഇതുവരെ കഴിഞ്ഞിട്ടില്ലെന്ന് ഡി.ജി.പി നല്‍കിയ റിപ്പോര്‍ട്ടില്‍ പറയുന്നു.
മനുഷ്യാവകാശ കമ്മിഷനംഗം കെ. മോഹന്‍കുമാറിന്റെ നേതൃത്വത്തില്‍ പി.ഡബ്ല്യു.ഡി റസ്റ്റ് ഹൗസില്‍ നടന്ന സിറ്റിങില്‍ മണിയുടെ സഹോദരന്‍ ആര്‍.എല്‍.വി രാമകൃഷ്ണനും ചാലക്കുടി പൊലിസും ഹാജരായിരുന്നു. പൊലിസിന്റെയും ആഭ്യന്തരസെക്രട്ടറിയുടെയും റിപ്പോര്‍ട്ടുകള്‍ പരിശോധിച്ച ശേഷം വീണ്ടും കമ്മിഷനെ സമീപിക്കുമെന്ന് മണിയുടെ സഹോദരന്‍ പ്രതികരിച്ചു.