തേഞ്ഞിപ്പലം: സമസ്ത കേരള ജംഇയ്യത്തുല്‍ മുഅല്ലിമീന്‍ സെന്‍ട്രല്‍ കൗണ്‍സില്‍ നല്‍കുന്ന മാതൃകാ മുഅല്ലിം അവാര്‍ഡിന് അബ്ദുറസാഖ് മുസ്‌ലിയാര്‍ തലക്കശ്ശേരിയെ തെരഞ്ഞെടത്തു. 28 വര്‍ഷമായി മൂന്നാക്കല്‍ അഞ്ചുമുല്‍ ഇസ്‌ലാം സെക്കന്‍ഡറി മദ്‌റസയിലെ സ്വദ്ര്‍ മുഅല്ലിമായി സേവനം ചെയ്തുവരുന്നു. സമസ്ത കേരള ജംഇയ്യത്തുല്‍ മുഅല്ലിമീന്‍ മലപ്പുറം വെസ്റ്റ് ജില്ലാ ട്രഷററുമാണ്.

തലക്കശ്ശേരി ഹയാത്തുല്‍ ഇസ്‌ലാം മദ്‌റസയിലെ പ്രാഥമിക പഠനത്തിനു ശേഷം തൃശൂര്‍ ജില്ലയിലെ കടലായി ജുമാ മസ്ജിദില്‍ ഇ.കെ ഹൈദര്‍ മുസ്‌ലിയാരുടെ ദര്‍സില്‍ ഒന്‍പത് വര്‍ഷം ഉപരിപഠനം നടത്തിയ അബ്ദുറസാഖ് മുസ്്‌ലിയാര്‍ 1993ല്‍ കടലായി അന്‍വാറുല്‍ ഇസ്‌ലാം മദ്‌റസയിലാണ് അധ്യാപനജീവിതം ആരംഭിച്ചത്. തൃശൂര്‍ ജില്ലയിലെ ദാറുസ്സലാം മദ്‌റസ, നെടുമ്പറമ്പ് മാണിയങ്കാവ് ഹയാത്തുല്‍ ഇസ്‌ലാം മദ്‌റസ എന്നിവിടങ്ങളിലും സേവനമനുഷ്ഠിച്ചിട്ടുണ്ട്.

മലപ്പുറം വെസ്റ്റ് ജില്ലാ മാതൃകാ മുഅല്ലിം അവാര്‍ഡ്, കെ.ടി മാനു മുസ്‌ലിയാര്‍ സ്മാരക അവാര്‍ഡ് എന്നിവയും ലഭിച്ചിട്ടുണ്ട്. 24ന് ചേളാരിയില്‍ വച്ച് നടക്കുന്ന എസ്.കെ.ജെ.എം സാരഥീ സംഗമത്തില്‍ അവാര്‍ഡ് സമ്മാനിക്കും.