പെരിന്തല്‍മണ്ണ: താഴെക്കോട് പഞ്ചായത്തില്‍ വസ്തു നികുതിയും കാലഹരണപ്പെട്ട കുടിശ്ശികയും പിരിച്ചെടുക്കുന്നതില്‍ വീഴ്ച വരുത്തിയതിന് നാല് ഉദ്യോഗസ്ഥരില്‍ നിന്നും പിഴ ഈടാക്കാന്‍ നടപടി. 2013-14 സാമ്പത്തിക വര്‍ഷത്തെ 511915 രൂപ പിരിച്ചെടുക്കുന്നതിന് വാഴ്ച വരുത്തിയതിനാണ് പിഴ പലിശ സഹിതം ഈടാക്കാന്‍ പഞ്ചായത്ത് ഡയറക്ടര്‍ ഉത്തരവിറക്കിയത്. പിഴ പലിശ സഹിതം നാല് പേരില്‍ നിന്നുമായി 696204 രൂപ ഈടാക്കാനാണ് സര്‍ക്കാര്‍ ഉത്തരവിറക്കിയത്. മൂന്ന് വര്‍ഷത്തിനുള്ളില്‍ വേണം കെട്ടിട നികുതിയടക്കാന്‍ ഇതല്ലെങ്കില്‍ വസ്തു കാലഹരണപ്പെട്ട് പോകും. ഈ കാലയളവില്‍ ഉദ്യോഗസ്ഥര്‍ക്ക് നികുതി പിരിക്കാന്‍ കഴിഞ്ഞിരുന്നില്ല. മുന്‍പും ഇത്തരത്തില്‍ കാലഹരണപ്പെട്ട് പോയെങ്കിലും നടപടികളുണ്ടായിരുന്നില്ല. ഇത്തവണ പഞ്ചായത്ത് ഡയറക്ടര്‍ പണം പിരിച്ചെടുക്കാന്‍ ഉത്തരവിടുകയായിരുന്നു. ക്ലര്‍ക്കുമാര്‍ക്കാണ് സാധാരണ നികുതി പിരിക്കാന്‍ ചുമതല. നിരവധി ജോലിഭാരമാണ്  ഉദ്യോഗസ്ഥര്‍ക്ക് നികുതി പിരിക്കാന്‍ കഴിയാത്തതിന് കാരണം. അതേ സമയം പഞ്ചായത്തിലെ മറ്റു ഉദ്യോഗസ്ഥര്‍ക്കെതിരെ നടപടിയെടുക്കാതെ എല്‍.ഡി ക്ലര്‍ക്കുമാര്‍ക്കെതിരെ നടപടിയെടുത്തതിനെതിരെ പ്രതിഷേധം ശക്തമായിട്ടുണ്ട്.