കണ്ണൂര്‍: ആധുനിക ലോകം മാനവരാശിക്ക് നല്‍കിയ അത്ഭുതങ്ങളിലൊന്നാണ് മഹാത്മ ഗാന്ധിയെന്ന് മന്ത്രി എ.കെ ബാലന്‍. സാമൂഹ്യ ഐക്യദാര്‍ഢ്യ പക്ഷാചരണത്തിന്റെ സംസ്ഥനതല ഉദ്ഘാടനം നിര്‍വഹിക്കുകയായിരുന്നു മന്ത്രി.
തോക്കിനോടും വാളിനോടും ജയിക്കാന്‍ ശേഷിയുള്ള ആയുധമായിരുന്നു അദ്ദേഹത്തിന്റെ സഹനസമരം. രാജ്യത്തെ പട്ടിക വിഭാഗങ്ങളടക്കമുള്ള പാര്‍ശ്വവല്‍ക്കരിക്കപ്പെട്ട പാവങ്ങളോടൊപ്പമായിരുന്നു എന്നും ഗാന്ധിയുടെ മനസ്.
രാജ്യത്തിന് സ്വാതന്ത്ര്യം കിട്ടിയപ്പോള്‍ ചെങ്കോട്ടയിലേക്കല്ല, മരണത്തെ മുഖാമുഖം കണ്ട് നവഖാലിയിലെ തെരുവീഥികളിലേക്കാണ് അദ്ദേഹം പോയത്. അധികാരം ഒരിക്കലും ഗാന്ധിജിയെ മോഹിപ്പിച്ചിരുന്നില്ല. ഗാന്ധിജിയുടെ ജീവിതവും സന്ദേശവും ഇന്ന് പ്രസക്തമാണെന്നും മന്ത്രി പറഞ്ഞു.
മന്ത്രി കടന്നപ്പള്ളി രാമചന്ദ്രന്‍ അധ്യക്ഷനായി. മേയര്‍ ഇ.പി ലത, പി.കെ ശ്രീമതി എം.പി എന്നിവര്‍ വിശിഷ്ടാതിഥികളായി. സ്‌കൂള്‍ കലോത്സവത്തിലെ വിജയികള്‍ക്ക് ജില്ലാ പഞ്ചായത്ത് പ്രസിഡന്റ് കെ.വി സുമേഷ് പുരസ്‌കാരം നല്‍കി. സാഹിത്യകാരന്‍ എം. മുകുന്ദന്‍ പ്രഭാഷണം നടത്തി. കലക്ടര്‍ മീര്‍ മുഹമ്മദ് അലി സമ്മാനദാനം നിര്‍വഹിച്ചു. അലി അസ്ഗര്‍ പാഷ, വെള്ളോറ രാജന്‍, ടി.ടി റംല, അജിത്ത് മാട്ടൂല്‍, ലിഷ ദീപക്, ജാക്വലിന്‍ ഷൈനി ഫെര്‍ണാണ്ടസ്, കെ.ജെ മൈക്കിള്‍ സംസാരിച്ചു.