കോഴിക്കോട്: ജില്ലയില്‍ വെള്ളിയാഴ്ച വൈകിട്ടുമുതല്‍ ശക്തമായ മഴ തുടരുകയാണ്. മാസങ്ങള്‍ക്ക് മുന്‍പ് ഉരുള്‍പൊട്ടലുണ്ടായ കണ്ണപ്പന്‍കുണ്ടില്‍ ശക്തമായ മലവെള്ളപ്പാച്ചിലുണ്ടായി. വനത്തില്‍ ഉരുള്‍പൊട്ടിയതായാണ് സംശയമെങ്കിലും സ്ഥിരീകരണമില്ല. മലവെള്ളപ്പാച്ചിലിനെ തുടര്‍ന്ന് തോടുകളും നീര്‍ച്ചാലുകളും നിറഞ്ഞു. ഈ സമയം പ്രദേശത്ത് മഴയില്ലായിരുന്നു. എന്നാല്‍ വയനാട്ടില്‍ രണ്ടു മണിക്കൂറോളം ശക്തമായ മഴപെയ്യുന്നതിനിടെയാണ് മലവെള്ളപ്പാച്ചിലുണ്ടായത്.

അതിനിടെ, വൃഷ്ടിപ്രദേശത്ത് മഴ ശക്തമായതിനെ തുടര്‍ന്ന് കക്കയം ഡാം തുറന്നു. ഉച്ചയ്ക്ക് രണ്ടിന് അര അടിയാണ് ഡാമിന്റെ ഷട്ടര്‍ തുറന്നത്. പിന്നീട് നീരൊഴുക്ക് വര്‍ധിച്ചതിനെ തുടര്‍ന്ന് ഉച്ചയ്ക്കു ശേഷം മൂന്നരയ്ക്ക് ഷട്ടര്‍ ഒരു അടിയായും അഞ്ചു മണിയ്ക്ക് ഒന്നര അടിയായും ഷട്ടര്‍ നീരൊഴുക്ക് ഉയര്‍ത്തിയതായി ഡാം സേഫ്റ്റി എക്‌സിക്യൂട്ടീവ് എഞ്ചിനീയര്‍ അറിയിച്ചു. കുറ്റ്യാടി പുഴയുടെ തീരത്തു വസിക്കുന്നവര്‍ ജാഗ്രത പാലിക്കണമെന്നും നിര്‍ദേശമുണ്ട്. ജില്ലയുടെ കിഴക്കന്‍ മേഖലയിലും കനത്ത മഴ തുടരുകയാണ്.