കാട്ടാക്കട: തച്ചോട്ടുകാവില്‍ ടൂവീലര്‍ വര്‍ക്ക് ഷോപ്പില്‍ തീപിടിത്തം. റിപ്പയറിങിന് സൂക്ഷിച്ചിരുന്ന അഞ്ച് ബൈക്കുകള്‍ കത്തിനശിച്ചു. തച്ചോട്ടുകാവ് ജങ്ഷനില്‍ എം.പി ഗ്യാസ് ഏജന്‍സിക്ക് സമീപം മലയം വേങ്കൂര്‍ ശിവതീര്‍ഥത്തില്‍ ശിവന്റെ ഉടമസ്ഥതയിലുള്ള വര്‍ക്ക് ഷോപ്പില്‍ വ്യാഴാഴ്ച രാത്രി 12 മണിയോടെയാണ് തീപിടിത്തമുണ്ടായത്. വര്‍ക്ക് ഷോപ്പിന് പുറത്ത് ബൈക്കുകളിരുന്ന ഭാഗത്താണ് അഗ്‌നിബാധയുണ്ടായത്. പേയാട് റോഡിലൂടെ സഞ്ചരിക്കുകയായിരുന്ന ഓട്ടോ ഡ്രൈവറാണ് തീപിടിത്തം ആദ്യം കണ്ടത്. ഇയാള്‍ അറിയിച്ചതനുസരിച്ച് നാട്ടുകാരും പൊലിസും സ്ഥലത്തെത്തി. കാട്ടാക്കടയില്‍നിന്ന് ഫയര്‍ഫോഴ്‌സ് എത്തിയശേഷമാണ് തീകെടുത്താനായത്.
വര്‍ക്ക് ഷോപ്പിനുള്ളിലേക്ക് തീ പടരാതിരുന്നത് നാശനഷ്ടം കുറച്ചു. ഫയര്‍ഫോഴ്‌സെത്തി ഉടന്‍ തീയണച്ചതിനാല്‍ സമീപത്തെ കടകളിലേക്ക് വ്യാപിക്കാതിരുന്നത് വന്‍ദുരന്തം ഒഴിവാക്കി. ബൈക്കുകള്‍ ആരോ കത്തിച്ചതാണെന്ന് ശിവന്‍ ആരോപിച്ചു. മലയിന്‍കീഴ് പോലീസ് സ്ഥലത്തെത്തി അന്വേഷണം നടത്തി. ഫോറന്‍സിക് വിഭാഗത്തിന്റെ സഹായത്തോടെ ഇന്നലെ തെളിവെടുപ്പ് നടത്തി. ഒരു ലക്ഷത്തോളം രൂപയുടെ നാശനഷ്ടമുണ്ടായതായാണ് പ്രാഥമിക നിഗമനം.