തിരുവനന്തപുരം: അമ്പൂരിയില്‍ ഭാര്യയെ കഴുത്തുഞെരിച്ച് കൊന്ന് കുഴിച്ചുമൂടിയ കേസിലെ മുഖ്യപ്രതിയും സൈനികനുമായ അഖിലിനെ പൊലിസ് പിടികൂടി. തിരുവനന്തപുരം വിമാനത്താവളത്തില്‍ വച്ചാണ് ഇയാളെ പൊലിസ് പിടികൂടിയത്. പ്രതിയെ ചോദ്യം ചെയ്യുന്നതിനായി ഡിവൈ.എസ്.പി ഓഫിസിലേക്ക് കൊണ്ടുപോയി. രാത്രിയോടെ ഡല്‍ഹിയില്‍ നിന്നും തിരുവനന്തപുരത്തെത്തിയ ഇയാളെ വിമാനത്താവളത്തിനകത്തും പുറത്തുമായി കാത്തുനിന്ന ഷാഡോ പൊലിസ് അറസ്റ്റ് ചെയ്യുകയായിരുന്നു.

പൂവാര്‍ സ്വദേശിയായ രാഖിയെയാണ് അഖിലും സഹോദരനും സുഹൃത്തും ചേര്‍ന്ന് കൊലപ്പെടുത്തിയത്. മറ്റ് രണ്ട് പേരെയും പൊലിസ് നേരത്തേ അറസ്റ്റ് ചെയ്തിരുന്നു. ഒരുമാസമായി യുവതിയെ കാണാനില്ലായിരുന്നു. ബന്ധുക്കള്‍ പൊലിസില്‍ പരാതി നല്‍കിയതിനെ തുടര്‍ന്ന് പൊലിസ് അന്വേഷണം നടത്തുന്നതിനിടെ അഖിലിന്റെ പുതുതായി നിര്‍മിക്കുന്ന വീടിനോട് ചേര്‍ന്നുള്ള പറമ്പില്‍ രാഖിയുടെ മൃതദേഹം കണ്ടെത്തിയത്.

എറണാകുളത്ത് കോള്‍ സെന്ററില്‍ ജോലി ചെയ്യുന്ന രാഖി കഴിഞ്ഞമാസം 21ന് വീട്ടിലേക്കെന്ന് പറഞ്ഞ് ഇറങ്ങിയതായിരുന്നു.കഴിഞ്ഞ ഒരുമാസമായി പൊലിസ് മൃദദേഹത്തിനായി പ്രദേശത്ത് തിരച്ചില്‍ നടത്തുകയായിരുന്നു.