ലക്‌നൗ:ബാബരി മസ്ജിദ് കേസില്‍ മുതിര്‍ന്ന ബി.ജെ.പി നേതാവ് എല്‍.കെ അദ്വാനിയുടെ വിടുതല്‍ ഹരജി സി.ബി.ഐ കോടതി തള്ളി. കേസിൽ നിന്നും കുറ്റവിമുക്തരാക്കാൻ കഴിയില്ലെന്ന്​ വ്യക്തമാക്കിയ കോടതി അദ്വാനിക്കെതിരെ കോടതി ക്രിമിനല്‍ ഗൂഢാലോചനക്കുറ്റം ചുമത്തി. ഉമാ ഭാരതി, മുരളി മനോഹര്‍ ജോഷി എന്നിവരുൾപ്പെടെ 11 പ്രതികൾ നൽകിയ വിടുതൽ ഹരജിയും കോടതി തള്ളി.

അതേസമയം, ബാബറി മസ്ജിദ് തകര്‍ത്തതിലെ ഗൂഢാലോചന കേസില്‍ എല്‍.കെ അദ്വാനി, ഉമാ ഭാരതി അടക്കം 12 പ്രതികള്‍ക്കും കോടതി ജാമ്യം അനുവദിച്ചു. സി.ബി.ഐ ലക്‌നൗ പ്രത്യേക കോടതിയാണ് ജാമ്യം നല്‍കിയത്. കോടതി ഉത്തരവ് പ്രകാരം പ്രതികളെല്ലാം ഇന്ന് നേരിട്ട് ഹാജരായിരുന്നു.

ജാമ്യത്തുകയായി നേതാക്കള്‍ കോടതിയില്‍ 50,000 രൂപവീതം കെട്ടിവെക്കണം.ഗൂഢാലോചനക്കുറ്റം പ്രതികള്‍ കോടതിയില്‍ നിഷേധിച്ചു. ബാബരി മസ്ജിദ് തകര്‍ത്തകേസില്‍ ബി.ജെ.പി നേതാക്കള്‍ക്കെതിരായ ഗൂഡാലോചന കുറ്റം സുപ്രിംകോടതി പുനസ്ഥാപിച്ച ശേഷമാണ് കേസില്‍ ഈ മാസം 22 ന്  ലക്‌നൗ സി.ബി.ഐ പ്രത്യേകകോടതി വിചാരണ ആരംഭിച്ചത്. നേരിട്ട് ഹാജരാകണമെന്നും കേസ് മാറ്റിവെക്കണമെന്ന അപേക്ഷ പരിഗണിക്കില്ലെന്നും കോടതി നേരത്തെ തന്നെ വ്യക്തമാക്കിയിരുന്നു.

2001ല്‍ ഇവര്‍ക്കെതിരായ ഗൂഢാലോചന കുറ്റം റായ്ബറേലി കോടതി ഒഴിവാക്കിയിരുന്നു. സിബിഐ ആവശ്യപ്രകാരം സുപ്രിം കോടതി കുറ്റം പുനസ്ഥാപിക്കുകയായിരുന്നു.