മലപ്പുറം: റവന്യൂ ഓഫിസുകളില്‍ സ്വീകരിക്കുന്ന പണം അന്നുതന്നെ ട്രഷറികളിലെത്തിക്കുന്ന പദ്ധതിക്ക് നാളെ തുടക്കം. നിലവില്‍ വിവിധ നികുതി ഇനങ്ങളിലായി ലഭിക്കുന്ന തുക ദിവസങ്ങളോളം വില്ലേജ് ഓഫിസര്‍മാര്‍ കൈവശംവയ്ക്കാറാണ് പതിവ്. ഈ തുക ആഴ്ചയിലൊരിക്കല്‍ താലൂക്ക് ഓഫിസ് വഴിയാണ് ബാങ്കുകളിലെത്തുന്നത്.
പദ്ധതി നടപ്പാക്കുന്നതിന്റെ ഭാഗമായി സംസ്ഥാനത്തെ 15 ബാങ്കുകളെ ട്രഷറിയുമായി ബന്ധിപ്പിച്ചു. വില്ലേജ് ഓഫിസുകളില്‍ സ്വീകരിക്കുന്ന പണം ബാങ്കുകള്‍ വഴിയാണ് ട്രഷറികളിലെത്തുക. ഇതിനായി ഇ- ട്രഷറി സോഫ്റ്റ്‌വെയറില്‍ പ്രത്യേക സൗകര്യം ഒരുക്കിയിട്ടുണ്ട്. വില്ലേജില്‍ കരമടയ്ക്കുന്നവര്‍ക്ക് രശീത് നല്‍കുന്ന രീതിയില്‍ മാറ്റമുണ്ടാകില്ല. ഇതോടൊപ്പം വെബ് പോര്‍ട്ടല്‍ വഴി വിവരങ്ങള്‍ പ്രത്യേകം അപ്‌ലോഡ് ചെയ്യുകയും വേണം. ഇത് ഉദ്യോഗസ്ഥരുടെ ജോലിഭാരം ഇരട്ടിയാക്കുമെന്ന ആക്ഷേപമുയര്‍ന്നിട്ടുണ്ട്.
പണം എല്ലാ ദിവസവും അക്കൗണ്ട് ക്ലോസ്‌ചെയ്ത ശേഷം ബാങ്കില്‍ അടയ്ക്കുന്നതാണ് പുതിയ സംവിധാനം. ലഭിച്ച തുക ഹെഡ് ഓഫ് അക്കൗണ്ട് തിരിച്ച് ചെലാന്‍ തയാറാക്കിയാണ് അടയ്‌ക്കേണ്ടത്. ബാങ്കുകള്‍ തുക ഉടന്‍ ട്രഷറികളിലേക്ക് മാറ്റും.
പദ്ധതി പൂര്‍ണമായി നടപ്പാകുന്നതോടെ വില്ലേജ് ഓഫിസ്, താലൂക്ക്, കലക്ടറേറ്റ് എന്നിവിടങ്ങളില്‍ നിലവില്‍ ഉപയോഗിക്കുന്ന എല്‍.ആര്‍, ടി.ആര്‍ രശീതുകള്‍ നിര്‍ത്തലാക്കി ഇ- ട്രഷറി സംവിധാനത്തിലേക്ക് മാറാനാണ് ധനകാര്യവകുപ്പ് ആലോചിക്കുന്നത്. നിലവില്‍ വൈകിട്ട് അഞ്ചുവരെയാണ് വില്ലേജ് ഓഫിസുകളില്‍ നികുതി സ്വീകരിക്കുന്നത്. പുതിയ സംവിധാനം വരുന്നതോടെ നികുതി സ്വീകരിക്കല്‍ ഉച്ചവരെ പരിമിതപ്പെടുത്തുകയോ ബാങ്കിങ് സമയം ദീര്‍ഘിപ്പിക്കുകയോ വേണ്ടിവരും.
സാധാരണ ദിവസങ്ങളില്‍ മിക്ക വില്ലേജുകളിലും നാമമാത്രമായി മാത്രമേ നികുതി ലഭിക്കാറുള്ളൂ. എല്ലാ ദിവസവും ചെലാന്‍ തയാറാക്കി പണം അടയ്ക്കണമെന്ന് പറയുന്നുണ്ടെങ്കിലും ഇതിനുവേണ്ട യാത്രാ ചെലവ് പ്രത്യേകം വകയിരുത്തിയിട്ടില്ല. സംസ്ഥാനത്തെ മിക്ക വില്ലേജുകളിലും രണ്ട് കംപ്യൂട്ടറുകളും ഒരു പ്രിന്ററുമാണുള്ളത്.
സര്‍ട്ടിഫിക്കറ്റ് നല്‍കല്‍, ഓണ്‍ലൈന്‍ പി.വി, ആര്‍.ഒ നല്‍കല്‍ തുടങ്ങി നിരവധി പ്രവര്‍ത്തനങ്ങള്‍ക്ക് ഈ സൗകര്യം മതിയാവാത്തതിനാല്‍ പുതിയ പരിഷ്‌കാരം കാര്യക്ഷമമായി നടപ്പാക്കല്‍ പ്രയാസമാണെന്നാണ് ജീവനക്കാര്‍ പറയുന്നത്. ബാങ്കുകളില്‍ പണമടയ്ക്കുന്നത് ആഴ്ചയില്‍ ഒന്നോ രണ്ടോ ദിവസമാക്കണമെന്നാണ് ജീവനക്കാരുടെ ആവശ്യം.