നിലമ്പൂര്‍: റോഡ് പണിക്ക് തുക അനുവദിച്ച് മാസങ്ങള്‍ കഴിഞ്ഞിട്ടും പ്രവൃത്തി തുടങ്ങാത്തതില്‍ പ്രതിഷേധിച്ച് നഗരസഭാ കൗണ്‍സിലര്‍മാരുടെ നേതൃത്വത്തില്‍ നാട്ടുകാര്‍ നിലമ്പൂര്‍ പൊതുമരാമത്ത് ഓഫിസ് ഉപരോധിച്ചു. ടെന്‍ഡര്‍ നടപടി പൂര്‍ത്തീകരിച്ച് കരാറുകാര്‍ പ്രവര്‍ത്തികള്‍ ഏറ്റെടുത്ത് ആറ് മാസങ്ങളായിട്ടും പ്രവൃത്തികള്‍ ആരംഭിച്ചിട്ടില്ല.
റോഡ് പണിക്ക് ആവശ്യമായ സാധനസാമഗ്രികള്‍ റോഡില്‍ കൊണ്ടുവന്നിട്ടിട്ട് മാസങ്ങളായി. നിലമ്പൂര്‍ നഗരസഭയിലെ രണ്ട് പ്രധാന റോഡുകളായ ജില്ലാ ആശുപത്രി റോഡ്, വീട്ടിക്കുത്ത് റോഡുമാണ് തകര്‍ന്ന് കിടക്കുന്നത്. കാല്‍നടയാത്ര പോലും ഇതുവഴി അസാധ്യമായി തീര്‍ന്നിരിക്കുകയാണ്. പ്രളയക്കെടുതിക്ക് ശേഷം കുണ്ടുംകുഴിയും കാരണം ബൈക്ക് യാത്ര പോലും ദുസഹമാണ്.
പി.വി.അന്‍വര്‍ എം.എല്‍.എയാണ് റോഡുകള്‍ക്ക് ഫണ്ട് അനുവദിച്ചത്. രണ്ടു റോഡുകളുടെയും പുനരുധാരണ പ്രവൃത്തികള്‍ക്കായി 65 ലക്ഷം രൂപയാണ് അനുവദിച്ചിട്ടുള്ളത്. റോഡ് നന്നാക്കണമെന്ന് ആവശ്യപ്പെട്ട് മുമ്പും പൊതുമരാമത്ത് ഓഫിസ് ഉപരോധിച്ചിരുന്നു. രണ്ടാഴ്ച മുമ്പ് പ്രവര്‍ത്തി തുടങ്ങുമെന്നാണ് അധികൃതരും കരാറുകാരും അന്ന് അറിയിച്ചിരുന്നത്. കാലാവധി കഴിഞ്ഞിട്ടും പ്രവര്‍ത്തി തുടങ്ങാനുള്ള നീക്കം ഉണ്ടായില്ല. കരാറുക്കാരന്റെ അനാസ്ഥയാണ് പ്രവര്‍ത്തി നീളാന്‍ കാരണമെന്നും കരാറുകാരന്‍ സമയം കൂടുതല്‍ ആവശ്യപ്പെട്ടിട്ടുണ്ടെന്നുമാണ് എ.ഇയുടെ വിശദീകരണം. കരാറുകാരനുമായി അധികൃതരും സമരക്കാരും ചര്‍ച്ച നടത്തി. രാത്രിയോടെ തന്നെ പ്രവര്‍ത്തികള്‍ ആരംഭിക്കുമെന്ന രേഖാമൂലമുള്ള ഉറപ്പില്‍ പ്രതിഷേധക്കാര്‍ പിരിഞ്ഞുപോവുകയായിരുന്നു. സമരത്തിന് നഗരസഭ കൗണ്‍സിലര്‍മാരായ എന്‍.വേലുക്കുട്ടി, അരുമ ജയകൃഷ്ണന്‍, ഗോപാലകൃഷ്ണന്‍, നൈസി സജീവന്‍, ഗീത വിജയന്‍ എന്നിവര്‍ നേതൃത്വം നല്‍കി.