തളിപ്പറമ്പ് : ദേശീയപാതയില്‍ പരിയാരം വിളയാങ്കോട്ട് കാറും സ്വകാര്യ ബസും കൂട്ടിയിടിച്ച് 13 പേര്‍ക്ക് പരുക്ക്, രണ്ടുപേരുടെ നില ഗുരുതരം. ഇന്നലെ ഉച്ചക്ക് പന്ത്രണ്ടോടെ വിളയാങ്കോട് ശിവക്ഷേത്രത്തിന്റെ മുന്നിലായിരുന്നു അപകടം. കാര്‍ യാത്രക്കാരായ തലശേരി കോട്ടയം പൊയിലിലെ വള്ളിപുറവില്‍ വീട്ടില്‍ വി.വിപിന്‍(30), കൂത്തുപറമ്പ് നരവൂര്‍ പാണിശേരിയിലെ കുന്നുമ്മല്‍ വീട്ടില്‍ പ്രശാന്ത് സാലി(42), ഭാര്യ സില്‍ജ(40), മക്കളായ റിതിക(14) സയോന(13), ബസ് യാത്രികരായ വിശ്വംഭരന്‍(73), ഭാര്യ രമണി(68), ചന്ദ്രമതി(40), ഷെരീഫ(45), ലക്ഷ്മിക്കുട്ടി(60), ആരാധന (14), ദിവ്യമോള്‍(28), പ്രകാശന്‍ (29) എന്നിവര്‍ക്കുമാണ് പരിക്കേറ്റത്. ഇവരെ പരിയാരം മെഡിക്കല്‍ കോളജില്‍ പ്രവേശിപ്പിച്ചു. കാര്‍ ഡ്രൈവര്‍ വിപിന്‍, പ്രശാന്ത്‌സാലി എന്നിവരുടെ നില അതീവ ഗുരുതരമാണ്. പ്രശാന്ത് വെന്റിലേറ്ററിലാണ്. പയ്യന്നൂരില്‍ നിന്നും കണ്ണൂരിലേക്ക് പോകുന്ന എമിറേറ്റ്‌സ് ബസും തളിപ്പറമ്പ് ഭാഗത്തുനിന്നും പയ്യന്നൂരിലേക്ക് പോകുന്ന സിഫ്റ്റ്കാറുമാണ് കൂട്ടിയിടിച്ചത്. അമിതവേഗതയിലായിരുന്ന കാര്‍ മുന്നില്‍ പോകുന്ന രണ്ട് വാഹനങ്ങളെ ഓവര്‍ടേക്ക് ചെയ്ത് കയറുന്നതിനിടയില്‍ എതിരെ വന്ന ബസില്‍ ഇടിക്കുകയായിരുന്നു. പൂര്‍ണ്ണമായി തകര്‍ന്ന കാറില്‍ കുടുങ്ങിയ യാത്രക്കാരെ പരിയാരം മെഡിക്കല്‍ കോളജ് എസ്.ഐ സി.ജി.സാംസണിന്റെ നേതൃത്വത്തിലുളള പൊലിസും നാട്ടുകാരും ചേര്‍ന്ന് ഏറെ പണിപ്പെട്ടാണ് പുറത്തെടുത്ത് ആശുപത്രിയിലെത്തിച്ചത്.