കൊല്ലം: മുകേഷ് എം.എല്‍.എക്കെതിരേ അടിക്കടിയുണ്ടാകുന്ന വിവാദത്തില്‍ പ്രതിരോധിക്കാനാകാതെ കൊല്ലത്തെ സി.പി.എം. കഴിഞ്ഞ നിയമസഭാ തെരഞ്ഞെടുപ്പില്‍ അപ്രതീക്ഷിതമായിട്ടായിരുന്നു മുകേഷ് കൊല്ലം സീറ്റില്‍ സ്ഥാനാര്‍ഥിയായത്. സിറ്റിങ് എം.എല്‍.എയും വി.എസ് സര്‍ക്കാരില്‍ മന്ത്രിയുമായിരുന്ന പി.കെ ഗുരുദാസനെ ഒഴിവാക്കിയായിരുന്നു മുകേഷിനു സീറ്റ് നല്‍കിയത്.
തെരഞ്ഞെടുപ്പിനു ശേഷവും സിനിമയിലും ചാനല്‍ ഷോയിലും സജീവമായ മുകേഷ് മണ്ഡലത്തില്‍ ശ്രദ്ധ കേന്ദ്രീകരിക്കുന്നില്ലെന്ന പരാതി പാര്‍ട്ടി കേന്ദ്രങ്ങളില്‍പ്പോലും ചര്‍ച്ചാവിഷയമായിരുന്നു. ഔദ്യോഗിക പരിപാടികളില്‍ പലപ്പോഴും മുകേഷിനെ കൊല്ലത്തു കാണാതെ വന്നതും പാര്‍ട്ടിയില്‍ വിമര്‍ശനത്തിനു കാരണമായി.
മുകേഷിനെ കാണാനില്ലെന്നു കാണിച്ച് യൂത്ത് കോണ്‍ഗ്രസ് കൊല്ലം നിയോജകമണ്ഡലം പ്രസിഡന്റ് വിഷ്ണു സുനില്‍ പന്തളം പൊലിസില്‍ നല്‍കിയ പരാതി ദേശീയതലത്തില്‍പ്പോലും വാര്‍ത്താ പ്രാധാന്യം നേടുകയും ചെയ്തു. തുടര്‍ന്ന് പാര്‍ട്ടി ഉപദേശിച്ചതോടെ സിനിമാ തിരക്കുകള്‍ ഒഴിവാക്കി മുകേഷ് കൊല്ലത്ത് എത്താന്‍ തുടങ്ങി. എന്നാല്‍, പാര്‍ട്ടി ചട്ടക്കൂടില്‍നിന്നു പ്രവര്‍ത്തിക്കാന്‍ മുകേഷിനു കഴിയാതെ വന്നതും പാര്‍ട്ടിയെ പലപ്പോഴും പ്രതിസന്ധിയിലാക്കിയിരുന്നു. ഇതിനിടെയാണ് നടി ആക്രമിക്കപ്പെട്ട കേസില്‍ മുകേഷ് ആരോപണവിധേയനായത്. കോണ്‍ഗ്രസും ബി.ജെ.പിയും ഉള്‍പ്പെടെ മുകേഷിനെതിരേ രംഗത്തെത്തിയിട്ടും പ്രതിരോധിക്കാന്‍ സി.പി.എം തയാറായില്ല. ഇതിനിടെ സി.പി.എം വിളിച്ചുവരുത്തി ശകാരിക്കുകയും ചെയ്തു. നടിയെ ആക്രമിച്ച കേസില്‍ ഇന്നസന്റും മുകേഷും കെ.ബി.ഗണേഷ്‌കുമാറും ഏറെ പഴി കേട്ടെങ്കിലും പാര്‍ട്ടി ചിഹ്നത്തില്‍ മത്സരിച്ചു ജയിച്ചയാള്‍ എന്ന നിലയില്‍ ഏറെ പ്രതിരോധത്തിലായത് മുകേഷായിരുന്നു. തുടര്‍ന്ന് താരസംഘടനയായ അമ്മയുടെ യോഗത്തില്‍ വച്ച് ദിലീപിനെ സംരക്ഷിച്ച മാധ്യമങ്ങള്‍ക്കെതിരേ രംഗത്തുവന്ന മുകേഷ് പാര്‍ട്ടിയെ വീണ്ടും പ്രതിസന്ധിയിലാക്കിയിരുന്നു.
നടിയെ ആക്രമിച്ച കേസിലെ മുഖ്യപ്രതി പള്‍സര്‍ സുനിയെ ദിലീപിന് കൈമാറിയത് മുകേഷ് തന്നെയാണെന്ന ആരോപണം ശക്തമായിരുന്നു. സുനിയുമായി മുകേഷിന് ദീര്‍ഘകാല ബന്ധം ഉണ്ടായിരുന്നെന്ന ആരോപണവും വിവാദമായി. തിലകന്‍ വിഷയത്തില്‍ മുകേഷിനെതിരേ നടനും തിലകന്റെ മകനുമായ ഷമ്മി തിലകനും സംവിധായകന്‍ വിനയനും രംഗത്തുവന്നിരുന്നു.
കൊല്ലത്തിന്റെ തീരദേശ മേഖലയില്‍ പ്രകൃതിക്ഷോഭങ്ങള്‍ മൂലം വന്‍ നാശനഷ്ടങ്ങള്‍ സംഭവിച്ചിട്ടും മുകേഷിനെ കാണാനോ പരാതി പറയാനോ പൊതുജനങ്ങള്‍ക്ക് കഴിഞ്ഞിട്ടില്ലെന്നും ആരോപണം ഉയര്‍ന്നിരുന്നു. രണ്ടുദിവസം കഴിഞ്ഞെത്തിയ മുകേഷിന്റെ പരാമര്‍ശത്തില്‍ മല്‍സ്യത്തൊഴിലാളികള്‍ പ്രതിഷേധം ഉയര്‍ത്തുകയും ചെയ്തിരുന്നു.