കൊച്ചി: കന്നുകാലികളെ കശാപ്പ് ചെയ്യാനായി ചന്തയില്‍ വില്‍ക്കുന്നത് തടഞ്ഞ കേന്ദ്ര സര്‍ക്കാര്‍ ഉത്തരവിലെ നിയമ പ്രശ്‌നങ്ങള്‍ ചൂണ്ടിക്കാട്ടി ഹൈബി ഈഡന്‍ എം.എല്‍.എ അടക്കമുള്ളവര്‍ നല്‍കിയ ഹരജി സിംഗിള്‍ ബെഞ്ച് ഇടക്കാല ഉത്തരവിനായി മാറ്റി. മൂന്നാഴ്ചയ്ക്കുള്ളില്‍ കേന്ദ്ര സര്‍ക്കാര്‍ സത്യവാങ്മൂലം നല്‍കണമെന്നും നിര്‍ദേശിച്ചിട്ടുണ്ട്.
കോഴിക്കോട് ജില്ലാ മീറ്റ് വര്‍ക്കേഴ്‌സ് അസോസിയേഷന്‍ (സി.ഐ.ടി.യു), കലൂരിലെ ഇറച്ചിക്കച്ചവടക്കാരനായ പി.യു കുഞ്ഞുമുഹമ്മദ്, കോഴിക്കോട് സ്വദേശികളായ  ടി.പി സാദിക്ക്, ടി.പി സാഹിദ് എന്നിവരാണ് മറ്റു ഹരജിക്കാര്‍. കന്നുകാലികളെ കശാപ്പിനായി ചന്തയില്‍ വില്‍ക്കുന്നത് തടഞ്ഞുകൊണ്ടുള്ള ഉത്തരവ് തങ്ങളുടെ ഉപജീവനത്തെ ബാധിക്കുമെന്നാണ് ഇറച്ചിക്കച്ചവടക്കാരുടെയും സംഘടനയുടെയും വാദം. എന്നാല്‍ സമ്പൂര്‍ണ്ണ കശാപ്പ് നിരോധനമില്ലെന്നും ഉത്തരവ് സ്റ്റേ ചെയ്യരുതെന്നും കേന്ദ്ര സര്‍ക്കാരിന്റെ അഭിഭാഷകന്‍ വാദിച്ചു.
കന്നുകാലി സംരക്ഷണമടക്കമുള്ള വിഷയങ്ങള്‍ സംസ്ഥാന സര്‍ക്കാരിന്റെ അധികാരപരിധിയിലുള്ള വിഷയമാണെന്നിരിക്കേ കേന്ദ്ര സര്‍ക്കാരിന്റെ പുതിയ ഉത്തരവ് നിയമവിരുദ്ധമാണെന്നും മാര്‍ക്കറ്റില്‍ നിന്ന് കന്നുകാലികളെ വാങ്ങി ഇറച്ചി വ്യാപാരം നടത്തുന്ന ചെറുകിട കച്ചവടക്കാരെ ഉത്തരവ് പ്രതികൂലമായി ബാധിക്കുമെന്നും ഹരജിക്കാര്‍ ചൂണ്ടിക്കാട്ടി. മൃഗങ്ങള്‍ക്കെതിരായ ക്രൂരകൃത്യങ്ങള്‍ തടയുന്നതിനുള്ള നിയമത്തില്‍ ഭക്ഷണത്തിനായി മൃഗങ്ങളെ കൊല്ലാമെന്ന് വ്യവസ്ഥയുണ്ട്. ഇതിനു വിരുദ്ധമായി കേന്ദ്ര സര്‍ക്കാര്‍ ചട്ടം കൊണ്ടുവരുന്നത് നിലനില്‍ക്കില്ലെന്നും ഇവര്‍ ചൂണ്ടിക്കാട്ടി. തുടര്‍ന്നാണ് ഇടക്കാല ഉത്തരവിനായി ഹരജി സിംഗിള്‍ ബെഞ്ച് മാറ്റിയത്.
കന്നുകാലികളെ കശാപ്പ് ചെയ്യാനായി ചന്തയില്‍ വില്‍ക്കുന്നത് തടഞ്ഞ കേന്ദ്ര സര്‍ക്കാര്‍ ഉത്തരനെതിരേയുള്ള പൊതുതാല്‍പര്യ ഹരജി ഡിവിഷന്‍ ബെഞ്ചില്‍ നിന്നു പിന്‍വലിച്ചിരുന്നു.