തിരുവനന്തപുരം: വിവിധ വകുപ്പുകളില്‍ അഴിമതി കണ്ടെത്തുന്നതിനായി മുന്‍ ഡയറക്ടര്‍ ജേക്കബ് തോമസ് തുടങ്ങിയ റിസര്‍ച്ച് അനാലിസിസ് ഇന്റലിജന്‍സ് വിങ് വിജിലന്‍സ് ഡയറക്ടര്‍ ലോക്‌നാഥ് ബെഹ്‌റ നിര്‍ത്തി. ഡെപ്യൂട്ടേഷന്‍ വ്യവസ്ഥയിലെത്തിയവരോട് പഴയസ്ഥാപനത്തിലേക്ക് മടങ്ങാനാണ് നിര്‍ദേശം.
തുടര്‍ന്ന് ഡപ്യൂട്ടേഷന്‍ പൂര്‍ത്തിയാക്കിയ 40പേര്‍ പഴയ സ്ഥാപനത്തിലേയ്ക്ക് മടങ്ങി. ബാക്കിയുള്ളവരെ ഡപ്യൂട്ടേഷന്‍ കാലാവധി തീരും മുറക്ക് മടങ്ങാനും ബെഹ്‌റ നിര്‍ദേശം നല്‍കി. അഴിമതിക്കെതിരേ ചുവപ്പ്, മഞ്ഞ കാര്‍ഡുകളുമായി ഇറങ്ങിയതിന് തൊട്ടുപിറകെയായിരുന്നു ജേക്കബ് തോമസ്,വിജിലന്‍സിന് കീഴില്‍ റിസര്‍ച്ച് ആന്റ് അനാലിസിസ് വിങ് തുടങ്ങിയത്.
സേനയിലെ വിവിധ ഉദ്യോഗസ്ഥരടങ്ങുന്ന സംഘത്തിന്റെ പ്രധാന ലക്ഷ്യം സര്‍ക്കാര്‍ വകുപ്പുകളിലെ അഴിമതി കണ്ടെത്തലായിരുന്നു. ഓരോ മൂന്നുമാസവും റിപ്പോര്‍ട്ട് പരസ്യപ്പെടുത്താനും തീരുമാനിച്ചിരുന്നു. വിവിധ തസ്തികകളിലായി 140 പേരാണ് ഈ വിഭാഗത്തിലുണ്ടായിരുന്നത്. രണ്ടുമാസം മുന്‍പാണ് റിസര്‍ച്ച് വിങിന്റെ ആദ്യ റിപ്പോര്‍ട്ട് പുറത്തുവിട്ടത്. മൂന്നു ഭാഗങ്ങളായി തിരിച്ചായിരുന്നു ഓരോ വകുപ്പുകളിലും നടക്കുന്ന അഴിമതി കണ്ടെത്തിയിരുന്നത്. ഏറ്റവും കൂടുതല്‍ അഴിമതി നടക്കുന്നത് തദ്ദേശ സ്ഥാപനങ്ങളിലാണെന്നായിരുന്നു ആദ്യ റിപ്പോര്‍ട്ടില്‍ ഉണ്ടായിരുന്നത്. തുടര്‍ന്ന് മന്ത്രി കെ.ടി ജലീല്‍ മുഖ്യമന്ത്രിയ്ക്ക് പരാതി നല്‍കുകയും ചെയ്തു.
ആദ്യ റിപ്പോര്‍ട്ട് പുറത്തു വന്നതിനെതുടര്‍ന്ന് പല വകുപ്പുകളിലും അഴിമതിയുടെ തോത് ഒരു പരിധിവരെ കുറയ്ക്കാന്‍ കഴിഞ്ഞിരുന്നു.