കൊച്ചി: ഇടുക്കിയും കോട്ടയവും സംസ്ഥാന സീനിയര്‍ ഫുട്‌ബോളിന്റെ സെമിയില്‍ പ്രവേശിച്ചു. ഇന്നലെ നടന്ന മത്സരത്തില്‍ വനാടിനെ പരാജയപ്പെടുത്തിയാണ് കോട്ടയം സെമിയില്‍ പ്രവേശിച്ചത്. അതേസമയം കാസര്‍കോടിനെ തകര്‍ത്ത് ഇടുക്കിയും സെമിയില്‍ പ്രവേശിച്ചു.
ശക്തരായ ഇടുക്കിയും കാസര്‍കോടും നേര്‍ക്കുനേര്‍ വന്ന മത്സരത്തില്‍ എട്ടു ഗോളായിരുന്നു പിറന്നത്. 5-3 എന്ന സ്‌കോറിനായിരുന്നു ഇടുക്കിയുടെ ജയം.
ആദ്യ പകുതി അവസാനിക്കുമ്പോള്‍ 2-0 എന്ന സ്‌കോറിന് കാസര്‍കോട് മുന്നില്‍ ആയിരുന്നു. എന്നാല്‍ രണ്ട@ാം പകുതിയില്‍ ഇടുക്കിയുടെ താണ്ഡവത്തില്‍ കാസര്‍കോട് തകര്‍ന്നടിയുകയായിരുന്നു.
ആദ്യ പകുതിയില്‍ സറ്റ്‌ലാജും വിഷ്ണുവും നേടിയ ഗോളായിരുന്നു കാസര്‍കോടിനെ മുന്നില്‍ എത്തിച്ചത്. രണ്ട@ാം പകുതിയുടെ തുടക്കത്തില്‍ ജമാലും സഫാലും നേടിയ ഗോളുകളോടെ 52ാം മിനുട്ടില്‍ സ്‌കോര്‍ 2-2 എന്നായി. പിന്നീട് 75ാം മിനുട്ടില്‍ ആസ്റ്റല്‍ തോമസ് ഇടുക്കിയെ 3-2ന് മുന്നില്‍ എത്തിച്ചു. ഉടന്‍ വിഷ്ണുവിലൂടെ തിരിച്ചടിച്ച് കാസര്‍കോട് സ്‌കോര്‍ 3-3 എന്നാക്കി.
അതിനു ശേഷം എല്‍ദോ സണ്ണിയും ഹരികൃഷ്ണനും വല ചലിപ്പിച്ചപ്പോള്‍ 5-3ന്റെ ജയം ഇടുക്കി സ്വന്തമാക്കി. മറ്റൊരു മത്സരത്തില്‍ വയനാടിനെ തോല്‍പിച്ചായിരുന്നു കോട്ടയം സെമിയില്‍ പ്രവേശിച്ചത്.
എതിരില്ലാത്ത ഒരു ഗോളിനായിരുന്നു കോട്ടയത്തിന്റെ ജയം. 29-ാം മിനുട്ടില്‍ ഗിഫ്റ്റി ഗ്രാഷിയസാണ് വിജയ ഗോള്‍ നേടിയത്. നാളെ നടക്കുന്ന ആദ്യ സെമിയില്‍ ഇടുക്കിയും കോട്ടയവും ഏറ്റുമുട്ടും. ഇന്ന് രാവിലെ ഒമ്പതിന് ആലപ്പുഴ ആതിഥേയരായ എറണാകുളത്തെ നേരിടും. രാവിലെ ഏഴിന് പാലക്കാടും കൊല്ലവും ഏറ്റുമുട്ടും. വൈകിട്ട് 3.30ന് കണ്ണൂരും തൃശൂരും തമ്മിലാണ് പോരാട്ടം.